खुलताबादमध्ये पोलिसांच्या छाप्यात घरातून ड्रग्ज जप्त; आरोपी अटकेत

खुलताबाद शहरात एकच खळबळ; ६८ हजारांच्या अंमली पदार्थासह एक जण अटकेत

खुलताबाद : खुलताबाद पोलिसांनी शहरातील आडवडी बाजार परिसरातील गुलाब शहा कॉलनीमध्ये एका घरावर छापा टाकून मोठ्या प्रमाणात अंमली पदार्थ जप्त केले आहेत. या कारवाईत आरोपीला अटक करण्यात आली आहे.

खुलताबाद पोलिस ठाण्याचे निरीक्षक धनंजय फराटे व बीट जमादार शेख जाकेर यांना मिळालेल्या गुप्त माहितीनुसार गुलाब शहा कॉलनीत चोरीछुपे अंमली पदार्थांची विक्री सुरू असल्याचे समजले. त्यानुसार शुक्रवारी रात्री पोलिस निरीक्षक फराटे यांच्या मार्गदर्शनाखाली सपोनि दिनकर गोरे, शेख जाकेर, गवळी, सदावर्ते यांच्यासह न्याय सहाय्यक वैज्ञानिक प्रयोगशाळेचे तज्ञ डॉ. किशोर गवळे, सहाय्यक रासायनिक विश्लेषक संदीप राठोड, आणि वैज्ञानिक सहाय्यक यांच्या मदतीने छापेमारी करण्यात आली.

शुक्रवारी रात्री ११:४५ वाजता पोलिस पथक गुलाब शहा कॉलनीत सय्यद इक्बाल याच्या घरासमोर पोहोचले. तेव्हा घरासमोर एक इसम संशयास्पद अवस्थेत उभा असल्याचे आढळले. पोलिसांनी त्याची विचारपूस केली असता त्याने आपले नाव सय्यद बिलाल उर्फ इक्बाल सय्यद खलील (वय ३८) असे सांगितले. पोलिसांनी छाप्याचा उद्देश स्पष्ट केल्यावर त्याच्या घराची पंचनामा करून झडती घेण्यात आली.

झडती दरम्यान घरातील लोखंडी कपाटात लपवून ठेवलेली एक प्लास्टिक पिशवी सापडली. त्यामध्ये मेफेड्रोन (एमडी) ड्रग्ज असलेल्या आठ लहान प्लास्टिकच्या पुड्या आणि दोन पिवळ्या रंगाच्या Magnesium Sulphate IP च्या नऊ पुड्या आढळून आल्या. विचारणा केली असता त्या पदार्थांबाबत आरोपीने उडवाउडवीची उत्तरे दिली, मात्र शेवटी ते ड्रग्ज असल्याचे कबूल केले.

जप्त केलेल्या अंमली पदार्थांची प्राथमिक तपासणी डॉ. किशोर गवळे व त्यांच्या सहकाऱ्यांनी केली असून सखोल रासायनिक विश्लेषणासाठी त्या पुड्या न्याय सहाय्यक वैज्ञानिक प्रयोगशाळेत पाठवण्यात येणार आहेत. या कारवाईत एकूण ६८,४२० रुपये किमतीचा मुद्देमाल पोलिसांनी जप्त केला आहे. सपोनि दिनकर गोरे यांच्या फिर्यादीवरून सय्यद बिलाल उर्फ इक्बाल याच्याविरुद्ध अंमली पदार्थ प्रतिबंधक कायद्यांतर्गत गुन्हा दाखल करून त्याला अटक करण्यात आली आहे. पुढील तपास सुरू आहे.