भंगारच्या आडून ड्रग्जचा गोरखधंदा; मायलॉन फार्मा कंपनीत पोलिसांकडून झाडाझडती

पोलिसांनी कंपनीच्या अधिकाऱ्यांना नोटिसा देत चौकशीसाठी पाचारण केले आहे.

छत्रपती संभाजीनगर : औषधी कंपनीच्या वेस्टेजमधून मेफेड्राॅनची (एमडी) तस्करी करण्यात येत असल्याचा पर्दाफाश एनडीपीएसच्या पथकाने केला. यात प्रकरणात भंगार व्यावसायिकास अटक केल्यानंतर सर्व आरोपींना मायलॉन फार्मा कंपनीमध्ये गुरुवारी दुपारी घेऊन जात पोलिसांनी झाडाझडती घेतली. त्याशिवाय पोलिसांनी कंपनीच्या अधिकाऱ्यांना नोटिसा देत चौकशीसाठी पाचारण केले आहे. त्यातून कंपनीतील कोणाचा सहभाग आहे का? याची माहिती समोर येणार आहे.

वाळुज एमआयडीसी परिसरातील भंगार व्यावसायिक बबन खान यांच्यासह त्याची मुले कलीम खान, सलीम खान, ट्रकचालक शफीफुल रहमान तफज्जुल हुसैन आणि राज अजुरे या पाच जणांना ड्रग्ज तस्करी प्रकरणात अटक केलेले आहे. यातील मुख्य आरोपी बबन खान यास मायलॉन कंपनीतील भंगाराचे कंत्राट २०११ साली मिळाले होते. या भंगाराच्या गाड्यातूनच बबन खान हा कंपनीच्या वेस्टेजमधून अमली पदार्थ बनविण्यासाठी लागणारे रसायन पिशव्यामध्ये काढून गोडाऊनमध्ये जमा करीत होता. हे रासायनिक पावडर मुंबईसह इतर राज्यात पाठविण्यात येत होती. त्यातून बबन खान याने कोट्यवधींची माया जमवल्याचा दावाही पोलिसांनी केला आहे. या रॅकेटमध्ये अनेक व्यक्तींचा सहभाग असल्याचे समोर येण्याची शक्यता आहे. अटक पाचही आरोपींना पोलिस कोठडी मिळाल्यानंतर तपास अधिकारी तथा गुन्हे शाखेचे वरिष्ठ पोलिस निरीक्षक संभाजी पवार, ‘एनडीपीएस’च्या पोलिस निरीक्षक गीता बागवडे यांच्यासह पथकाने वाळुज एमआयडीसीतील मायलॉन कंपनी गाठली. त्याठिकाणी सर्व आरोपींनीही नेण्यात आले. भंगार जमा करण्याची, त्याचे गेट पाससह इतर प्रकारची माहिती पोलिसांच्या पथकाने जमा केली. तसेच कंपनी येणारे रसायन, त्याचा वापर आणि वेस्टेजची लावण्यात येणारी विल्हेवाट याविषयी संपूर्ण माहिती घेतल्याचे सूत्रांनी सांगितले.

कंपनी अधिकाऱ्यांची होणार चौकशी

मायलॉन कंपनीतील भंगाराच्या कंत्राट देण्यासह वेस्टेजची विल्हेवाट लावणाऱ्या संबंधित अधिकाऱ्यांची चौकशी गुन्हे शाखेचे पथक करणार आहे. त्यासाठी संबंधितांना नोटिसा देण्यात आल्या आहेत. या चौकशीत कंपनीतील कोणाचा या गोरखधंद्यात सहभाग आहे की नाही, याचा माहिती समोर येणार आहे. वेस्टजेची विल्हेवाट लावताना आरोपी बबन खान यास रासायनिक पावडर देणाऱ्यांची नावेही समोर येतील, असेही पोलिस सूत्रांनी सांगितले. या प्रकरणात कंपनीसह राज्यभरात पाठविण्यात येणाऱ्या रॅकेटचा उलगडा होण्याची शक्यता वर्तविण्यात येत आहे.