परभणी शहर विकासावर चर्चा

 परभणी: शहराच्या विकास कामाबाबत मनपाचे महापौर प्रताप देशमुख यांनी निधीबाबत ५ मे रोजी पत्रक पाठविले होते़ यासंदर्भात उपमुख्यमंत्री अजित पवार यांनी २० मे रोजी मंत्र्यालयामध्ये विविध विभागाच्या अधिकार्‍यासोबत बैठक घेतली़ अध्यक्षस्थानी उपमुख्यमंत्री अजित पवार होते़ याप्रसंगी राज्यमंत्री उदय सामंत, आ़ नवाब मलिक, महापौर प्रताप देशमुख, उपमहापौर सज्जू लाला, सुधीर श्रीवास्तव, श्रीकांत सिंह, आऱ डी़ शिंदे, भापकर, गिरीश उमप, जी़ ए़ लोखंडे, दी़ वा़ दळवी, अप्पर जिल्हाधिकारी संभाजी झावरे, अधीक्षक अभियंता गणेशकर, नगरसेवक हफीज चाऊस, मनपा आयुक्त अभय महाजन, उपायुक्त दीपक पुजारी, शहर अभियंता रमेश वाघमारे आदी उपस्थित होते़ या बैठकीत परभणी शहराची वाढीव पाणी पुरवठा योजनेमध्ये पहिल्या टप्प्याचे काम पूर्ण झाले आहे़ दुसर्‍या टप्प्यामध्ये जागे अभावी रखडली आहे़ त्याबाबत महापौर प्रताप देशमुख यांनी जालना येथील पाणीपुरवठा योजनेस शासनाने ज्या प्रकार मदत केली त्याच धर्तीवर परभणी मनपाला सुद्धा मदत करावी, अशी सूचना केली़ याबाबत उपमुख्यमंत्री अजित पवार यांनी उद्योग विभाग व कृषी विभाग यांना मनपाला आवश्यक जागा देण्याबाबत सूचना देऊन पाणीपुरवठा योजना पूर्ण करण्यासाठी आवश्यक ती आर्थिक मदत करण्याबाबत महापौर प्रताप देशमुख यांना आश्वासन दिले़ तसेच कर्मचार्‍यांच्या पगारापोटी मिळणार्‍या सहाय्यक अनुदान फरकाची रक्कम ४ कोटी बर्‍याच वर्षापासून शासनाकडे प्रलंबित आहे़ त्याबाबत संचालक, नगरपालिका प्रशासन संचालनाय यांना त्वरीत आदा करण्याबाबत आदेशीत केले़ उपमहापौर सज्जू लाला यांनी अल्पसंख्याक क्षेत्र विकासकामासाठी निधी मिळावा अशी सूचना केली़ तसेच अलिगढ येथे जशी मुस्लिम विद्यापीठ आहे त्या धर्तीवर मरावाड्यात एक विद्यापीठ स्थापन होणार आहे़ विद्यापीठ परभणी येथे स्थापन करण्याची मागणी केली़ तसेच परभणी शहरात विद्युत तार आहेत़ त्या तार भूमीगत करण्याबाबत प्रस्ताव पाठविल्यास त्यास मंजुरी देण्याबाबत आश्वासन दिले़ मनपा कर्मचार्‍यांना मंजूर आकृतीबंध आराखड्यानुसार अधिकारी वर्ग उपलब्ध करून देण्याविषयी चर्चा झाली तसेच कृषी विद्यापीठाची ५ एकर जागा वॉटर ट्रिटमेंट प्लॅट आदीं कामासाठी १० कोटींचा निधी देण्याबाबत मुख्यमंत्री यांच्या बैठकीत आश्वासन देण्यात आले़