धनदांडगेच बिल बुडवे !

राजेश खराडे , बीडभारनियमन, वीजपुरवठ्यावर बोटे मोडणारेच महावितरणची बिले बुडविण्यात पुढे आहेत. महावितरणने टॉप हंड्रेड थकबाकीदारांची यादी तयार केली आहे. त्यावर नजर टाकली तर त्यात बहुतांश जण धनदांडगे व शासकीय कार्यालयांचाच समावेश आहे. ‘दिव्याखालीच अंधार’ अशी स्थिती असेल तर सामान्यांच्या मागेच तगादा का? असा प्रश्न आता उपस्थित केला जात आहे.महावितरण कंपनीला सर्वाधिक फटका हा शेतीपंप ग्राहकांकडून बसत आहे. दुसरीकडे जिल्ह्यातील व्यापारी, उद्योजक, नगरपालिका, शासकीय व निम्मशासकीय अशा सर्वाधिक थकबाकी असलेल्या सुरवातीच्या १०० ग्राहकांकडे बीड व अंबाजोगाई विभागातील तब्बल ११ कोटी ३४ लाख एवढी थकबाकी आहे. थकबाकीत दिवसेंदिवस वाढच होत आहे. व्यापारी ग्राहकाकडे सर्वाधिक १४ लाख २७ हजार थकबाकी आहे. टॉप हंड्रेडमध्ये औद्योगिक ग्राहकांची संख्या अधिक असून त्यापाठोपाठ व्यापारी आणि घरगुती ग्राहकांचा क्रमांक लागतो.औद्योगिक ग्राहक मोठ्या प्रमाणात विजेचा वापर करतात मात्र नियमितपणे बिले अदा करीत नसल्याचे दिसून येत आहे. बीड शहरातच व्यापारी, उद्योजक, शासकीय कार्यालये अधिक प्रमाणात आहेत. जिल्हा परिषद, नगरपालिका, सार्वजनिक बांधकाम, पोलिस अधीक्षक कार्यालये यांचाही समावेश ेटॉप हंड्रेडमध्येच आहे. त्यामुळे केवळ शेतीपंपग्राहक, घरगुती ग्राहक यांच्याकडूनच नाही तर शासकीय कार्यालयांचाही भुर्दंड महावितरणला सहन करवा लागत आहे. दुसरीकडे मात्र दुष्काळातही महावितरणकडून शेतकऱ्यांच्या मागे वसुलीचा तगादा सुरू आहे.