आंदोलनांचा दिवस

देशव्यापी संप : रास्ता रोको; मोर्चा तर शिक्षकांचा ठिय्या

सिन्नर : केंद्र व राज्य शासनाच्या कामगार विरोधी धोरणामुळे केंद्रीय व राज्य कर्मचारी महासंघ, कामगार संघटना कृती समिती, शिक्षक संघटना व विडी कामगारांनी लाक्षणिक संप पुकारुन आंदोलने केली. कामगार, शिक्षक, केेंद्र व राज्य कर्मचारी यांनी केलेल्या आंदोलनामुळे शुक्रवारचा दिवस ‘आंदोलनाचा दिवस’ ठरला.
शिक्षक संघटनेने तहसील कार्यालयासमोर दोन तास ठिय्या आंदोलन केले. कामगार संघटना कृती समितीच्यावतीने सिन्नर-शिर्डी रस्त्यावर रास्ता रोको आंदोलन केले तर सिन्नर तालुका विडी कामगार संघाने तहसील कार्यालयावर मोर्चा काढून तहसीलदारांना निवेदन दिले. या तीन आंदोलनामुळे शुक्रवारी सकाळपासून गर्दी दिसून येत होती.
रास्ता रोको व निवेदन
सीटूचे तालुकाध्यक्ष हरिभाऊ तांबे यांच्या नेतृत्त्वाखाली कामगार, कर्मचाऱ्यांंनी शनिवारी सकाळी १० वाजता हुतात्मा स्मारकाजवळून मोर्चा काढला. मोर्चात शासनविरोधी घोषणा देण्यात येत होत्या. नाशिक जिल्हा कामगार कर्मचारी संघटना संयुक्त कृती समितीच्या वतीने काढण्यात आलेल्या मोर्चात कारखाना कामगारांसह राज्य कर्मचारी संघटनेचे सभासद सहभागी झाली होते.
कामगार कायद्यातील कामगार विरोधी व मालक धार्जिणे बदल रद्द करा. कामगार कायद्याची कडक अंमल बजावणी करा. खाजगीकरण-कंत्राटीकरण-आऊटसोर्सिंगचे धोरण व निर्णय मागे घ्या. शिक्षणाचा बाजार बंद करुन सर्वांना मोफत व दर्जेदार शिक्षण द्या. केंद्र व राज्य शासनाच्या खात्यांसह जिल्हा परिषद नगरपालिका आणि महापालिकेतील ११ लाख रिक्त पदे त्वरित भरा. यंत्रमाग व बिडी कामगारांना शासनाने जाहिर केलेले किमान वेतन लागू करा. बांधकाम कामगारांना विमा, पेन्शन, बोनस आणि शेतमजूर, घरकामगारांसह अन्य असंघटीत कामगारांना नोंदणी करुन कल्याण मंडळामार्फत आरोग्य, विमा, पेन्शन लागू करा. बांधकाम, घरेलू कामगार आदिंच्या कल्याणकारी मंडळाचे पुनर्गठण करुन मान्यता द्या. कामगार संघटनांना मंडळावर सदस्यतेच्या आधारावर योग्य प्रतिनीधीत्व द्या. सार्वजनिक उद्योगांचे खाजगीकरण व विक्री रद्द करा. रेल्वे, विमा, किरकोळ व्यापार, औषधे, संरक्षण क्षेत्रातील थेट गुंतवणुकीचे धोरण मागे घ्या. भविष्य निर्वाह निधी, ईएसआयसी, पेन्शन योजना यासाठीचा निधी सट्टाबाजारात गुंतविण्याचा निर्णय मागे घ्या. आदिंसह विविध मागण्यांसाठी कामगार कर्मचारी संघटनांनी देशव्यापी संप पुकारला होता. मोर्चा वावीवेशीच्या चौफुलीवर आल्यानंतर कामगारांना रास्ता रोको आंदोलन केले. घटनास्थळी तहसीलदार मनोजकुमार खैरनार, पोलीस निरीक्षक राजेश शिंगटे यांनी येवून निवेदन स्विकारले. त्यानंतर रास्ता रोको आंदोलन मागे घेण्यात आले.
यावेळी सीटूचे तालुकाध्यक्ष हरिभाऊ तांबे, संतोष कुलकर्णी, रवींद्र गिरी, दत्ता वायचळे, अरुण घोडेराव, विकास जाधव, सुधाकर राऊत, गोविंद शिंदे, भरत गोळेसर, सूर्यभान सांगळे, किशोर सूर्यवंशी, माणिक रानडे, शरद वेलजाळी, विलास जाधव, बी. पी. ठोंबरे, धर्मा होन यांच्यासह कामगार सहभागी झाले होते.