मृत्यूला हुलकावणी! पैठण रोडवर वाळूचा हायवा कारवर उलटला, प्रवासी थोडक्यात बचावले

पैठण रोडवर वाळूचा हायवा कारवर उलटला; दोघांचे प्राण थोडक्यात वाचले, मोठी दुर्घटना टळली

छत्रपती संभाजीनगर: शहरातील पैठण रोडवर सोमवारी सायंकाळी एका भरधाव हायवा ट्रकने कारला चिरडल्याची भीषण घटना घडली. वाळूची अवैध वाहतूक करणारा हा हायवा ट्रक इतक्या वेगात होता की, चालकाचे नियंत्रण सुटल्याने तो थेट रस्त्यावरून जाणाऱ्या कारवर उलटला. या भीषण अपघातात कारचा पूर्णतः चक्काचूर झाला असला, तरी सुदैवाने कारमधील दोन्ही प्रवाशांचे प्राण वाचले आहेत.

जागरूक नागरिकांमुळे वाचले प्राण
मिळालेल्या माहितीनुसार, हायवा कारवर उलटत असताना एका प्रवाशाने प्रसंगावधान राखून चालत्या कारमधून बाहेर उडी मारली. मात्र, दुसरा प्रवासी कारमध्येच अडकला होता. अपघात घडताच परिसरातील जागरूक नागरिकांनी तातडीने धाव घेत मोठ्या शर्थीने अडकलेल्या प्रवाशाला सुखरूप बाहेर काढले. या थरारक अपघातामुळे पैठण रोडवर काही काळ वाहतुकीची मोठी कोंडी झाली होती.

वाळूमाफियांच्या विरोधात संताप
हा अपघात अनियंत्रित आणि अवैध वाळू वाहतुकीमुळे झाल्याचा गंभीर आरोप प्रत्यक्षदर्शी नागरिकांनी केला आहे. पैठण रोडवर वाळू वाहतूक करणाऱ्या वाहनांचा वेग प्रचंड असतो आणि त्यांच्यावर प्रशासनाचा कोणताही वचक नसल्याचे नागरिकांनी संताप व्यक्त करताना सांगितले. या प्रकरणी पोलिसांनी घटनास्थळी धाव घेतली असून अधिक तपास सुरू आहे.