दुधासाठी प्लास्टिक व गंजणार्‍या भांड्यावर बंदी

औरंगाबाद : दूध, दही, लस्सी तथा दुधापासून तयार केलेले पदार्थ गंजणार्‍या भांड्यांमध्ये तसेच धोकादायक प्लास्टिकच्या ड्रममध्ये साठवू नयेत. त्यासाठी गुणवत्तापूर्वक पात्र्याचाच वापर करावा; अन्यथा अन्न, औषधी विभाग कडक कारवाई करणार असल्याची माहिती अन्न, औषधी विभागाचे सहआयुक्त चंद्रशेखर साळुंके यांनी आज येथे पत्रकार परिषदेत दिली. औरंगाबाद शहरातील काही दुग्धजन्य पदार्थांची विक्री करणार्‍यांना बोलावून सविस्तर सूचना दिल्याचे त्यांनी सांगितले. कारखान्यातील रसायन व आॅईलचे रिकामे प्लास्टिकचे ड्रम दूध व दही साठविण्यासाठी करण्यात येत असल्याची माहिती अन्न, औषधी विभागाला मिळाली असल्याने खबरदारीची उपायोजना म्हणून व्यावसायिकांना सूचना दिल्या आहेत. मात्र, सूचनांचे पालन न करता जनतेच्या आरोग्याशी खेळ करणार्‍यांवर अन्न, औषधी प्रशासन विभाग कारवाई करणार आहे. दूध व दही प्लास्टिक व जंग लागू शकणार्‍या पात्रात साठवून ठेवल्यास ते आरोग्यासाठी घातक ठरू शकते. दूध, दही हे विशिष्ट प्रकारे पॅकिंग केलेले असावे. ते उघडे आणि धोकादायकपणे वाहून नेता येणार नाही, असेही सुचविण्यात आले असल्याची माहिती यावेळी देण्यात आली. याबाबत दिलेल्या सूचनांचे पालन न केल्यास गुन्ह्याचे स्वरूप पाहून २ ते १० लाख रुपयांपर्यंत दंडात्मक कारवाई होऊ शकते. सुरक्षितता न बाळगता सामान्य नागरिकांच्या जीविताशी खेळणार्‍यांविरुद्ध खटला चालविला जाणार आहे. अशा प्रकारे आरोग्यास घातक असणार्‍या पात्रामध्ये राजरोसपणे दूध, दही साठवून त्याची विक्री करणार्‍यांचा शोध घेण्यासाठी अन्न, औषधी प्रशासन विभागाचे पथक कामाला लागले आहे. नागरिकांनीही अशा पात्रांमधून विक्री केले जाणारे पदार्थ खरेदी करू नयेत, असे आवाहन साळुंके यांनी केले. 1 दुग्धजन्य पदार्थ अस्वच्छ व उघड्या वाहनातून वाहून नेऊ नयेत. उघडे पदार्थ नागरिकांनी विकत घेऊ नयेत. नागरिकांच्या आरोग्याशी खेळणार्‍यांवर अन्न औषधी विभागाचे पथक कडक कारवाई करणार आहे. 2 व्यावसायिकांसोबत बैठक घेऊन प्लास्टिक व गंज लागणारे भांडे वापरू नये, अशा सूचना दिल्या आहेत. सूचनांचे पालन न केल्यास २ ते १० लाखांपर्यंत दंडात्मक कारवाई. 3 दुग्धजन्य पदार्थ ठेवण्यासाठी स्टील, काच, चिनीमातीच्या भांड्याचा वापर हवा. कॅरीबॅग वापरणार्‍यावरही कारवाई.