‘हरित फुप्फुसे’ वाचवण्याची लढाई! गरवारे स्टेडियममधील ७५ झाडे तोंडीविरोधात जनहित याचिका

झाडे वाचवण्यासाठी नागरिकांची न्यायालयीन लढाई.

छत्रपती संभाजीनगर : ‘इंटरनॅशनल स्टेडियम’च्या नावाखाली छत्रपती संभाजीनगरमधील गरवारे स्टेडियम परिसरातील पूर्ण वाढ झालेल्या सुमारे ७५ झाडांच्या प्रस्तावित तोडीविरोधात जनहित याचिका दाखल करण्यात आली आहे. या याचिकेच्या अनुषंगाने मुंबई उच्च न्यायालयाच्या औरंगाबाद खंडपीठाने प्रतिवादींना नोटीस बजावण्याचा आदेश दिला आहे. या प्रतिवादींना २ आठवड्यांत नोटीसला उत्तर द्यावे लागणार आहे.

खंडपीठाने केंद्र व राज्य शासन, राज्याचे पर्यावरण, वन आणि हवामान बदलविभागाचे आणि नागरी विकास विभागाचे प्रधान सचिव, छत्रपती संभाजीनगर महापालिकेचे आयुक्त, उद्यान विभागाचे संचालक आणि एमआयडीसी यांना नोटीस बजावण्याचा आदेश दिला असून, एमआयडीसीला प्रतिवादी करण्याचे निर्देश याचिकाकर्त्यांना दिले आहेत.

काय आहे याचिका?ही याचिका ‘गरवारे हरित पट्टा बचाव समिती’च्यावतीने शिरीष कुलकर्णी व इतर यांनी दाखल केली आहे. याचिकेनुसार, छत्रपती संभाजीनगर येथील गरवारे स्टेडियममध्ये ‘साउथ पॅव्हेलियन’ उभारण्यासाठी ३० ते ४० वर्षे जुनी सुमारे ७५ झाडे तोडण्याचा प्रस्ताव असून, ५ फेब्रुवारी रोजी जाहिरात प्रसिद्ध करुन आक्षेप मागविले. मात्र, यासाठी कोणतीही सार्वजनिक सुनावणी घेण्यात आलेली नाही तसेच पर्यावरणीय परिणामांचा अभ्यास किंवा पर्यायी उपाययोजना विचारात घेतलेली नाही. याचिकेत पर्यावरणीय हानीचा आरोप करण्यात आला आहे. वृक्षतोडीचा प्रस्ताव बेकायदेशीर व पर्यावरणविरोधी असल्याचा आरोप याचिकेत केला आहे. प्रस्तावित वृक्षतोडीला ७ व ९ फेब्रुवारीला १०० पेक्षा अधिक नागरिकांनी हरकती नोंदवल्या आहेत. ‘इंटरनॅशनल स्टेडियम’च्या दाव्याला पुरावा नाही. पर्यावरणीय कायद्यांचे उल्लंघन झाल्याचा आरोप याचिकाकर्त्यांनी केला आहे. याचिकाकर्त्यांतर्फे ॲड. संकेत कुलकर्णी काम पाहत आहेत.

‘हरित फुप्फुसे’ वाचवण्याची लढाईगरवारे स्टेडियम परिसर हा शहरातील महत्त्वाची ‘हरित फुप्फुसे’ (ग्रीन लंगस्) असून, येथे असलेली झाडे ऑक्सिजन, सावली आणि प्रदूषण नियंत्रणासाठी अत्यंत आवश्यक आहेत. वृक्षतोड झाल्यास स्थानिक पर्यावरण व नागरिकांच्या आरोग्यावर गंभीर परिणाम होणार असल्याचे याचिकाकर्त्यांचे म्हणणे आहे.