६ लाखांचे बनावट खत टुणकी येथे पकडले

लोणी खुर्द : ओम फर्टिलायझर कंपनीचे सम्राट या नावाचे सहा लाख रुपये किमतीचे बनावट खत शेतकर्‍यांना विनापरवाना विक्री करताना बुधवारी वैजापूर तालुक्यातील टुणकी येथे पंचायत समितीच्या पथकाने पकडले

 लोणी खुर्द : नाशिक जिल्ह्यातील कामटवाडा येथील ओम फर्टिलायझर कंपनीचे सम्राट या नावाचे सहा लाख रुपये किमतीचे बनावट खत शेतकर्‍यांना विनापरवाना विक्री करताना बुधवारी वैजापूर तालुक्यातील टुणकी येथे पंचायत समितीच्या पथकाने पकडले. सात दिवसांपूर्वी टुणकी गावाजवळ असेच ११ टन बनावट खत पकडण्यात आले होते, त्यामुळे परिसरातील शेतकरी सावध होऊन आपण घेतलेले खत बनावट तर नाही ना, या संभ्रमात पडले व त्यांनी कृषी अधिकार्‍यांशी संपर्क साधून टुणकी येथे सध्या खतविक्री चालू असल्याची माहिती दिली. लगेच औरंगाबाद येथील जिल्हा कृषी अधिकार्‍यांसह तालुका कृषी अधिकारी व पंचायत समितीचे पथक घटनास्थळी दाखल झाले. यावेळी टुणकी, तलवाडा, अंचलगाव येथे सहा लाख रुपये किमतीचे बनावट खत शेतकर्‍यांच्या घरात दिसून आले. त्यावेळी ओम फर्टिलायझर कंपनीचे खत विक्रेते मारकड वासुदेव हिमणे, रा. मोहरी, भंडारा व नरेंद्र प्रेमलाल लांजेवार, रा. गोंदिया यांनाही टुणकी येथे रंगेहाथ पकडण्यात आले. विशेष म्हणजे सात दिवसांपूर्वी पकडण्यात आलेले धुळे जिल्ह्यातील देवपूर येथील शिव अ‍ॅग्रो बायोटेक इंडस्ट्रीज कंपनीचे बनावट खत पकडण्यात आले होते. त्यातील नरेंद्र लांजेवार हा आरोपी आहे. त्यामुळे आज पकडलेली कंपनी वेगळी व सात दिवसांपूर्वी पकडलेली खताची कंपनी वेगळी आहे; मात्र त्यातील नरेंद्र लांजेवार हा आज रोजी टुणकी येथे खत विक्रीसाठी आणखी दोन साथीदारांसह वेगळ्या कंपनीचे खत घेऊन उपस्थित झाला. सात दिवसांपूर्वी पकडण्यात आलेल्या आरोपीवर कृषी विभागाने कुठलीही कारवाई केली नाही, त्यामुळे आरोपीने लगेच दुसर्‍या कंपनीचे खत आणून व माणसे बदलून विक्री सुरू केली. वेळीच कृषी विभागाने या आरोपीवर गुन्हा दाखल केला असता तर शेतकर्‍यांची लाखो रुपयांची फसवणूक झाली नसती, असे शेतकर्‍यांनी सांगितले. खताचे नमुने प्रयोगशाळेत तपासणीसाठी पाठविले आहेत व संबंधित आरोपींवर गुन्हा दाखल करण्यात आला. पुढील तपास जमादार अशोक सोकटकर करीत आहेत. यावेळी सीताराम आसाराम कोलते, जिल्हा कृषी अधिकारी, तालुका कृषी अधिकारी मुनीर शेख, एच.आर. बोयनर, कृषी विस्तार अधिकारी प्रमोद कुसनेनिवार, खत निरीक्षक उपस्थित होते. (वार्ताहर)