वाळूअभावी भूमिगत कोळसा खाणी बंद होणार

वेकोलि अंतर्गत भूमिगत कोळसा खाणीसाठी वाळू मिळत नसल्याने जुन्या कोळसा खाणी बंद पडण्याच्या मार्गावर आहेत. अशीच स्थिती स्थानिक भूमिगत खाणीची आहे.

माजरी : वेकोलि अंतर्गत भूमिगत कोळसा खाणीसाठी वाळू मिळत नसल्याने जुन्या कोळसा खाणी बंद पडण्याच्या मार्गावर आहेत. अशीच स्थिती स्थानिक भूमिगत खाणीची आहे.
येथील न्यु. माजरी अंडर ग्राऊंड व नागलोन इंकलाईन नामक दोन भूमिगत खाणी आहेत. यापैकी माईन नं. ३ ही खाण स्वातंत्र्यपूर्वी काळापासून सुरु आहेत. या दोन खाणीची हजारोंच्या जवळपास श्रमशक्ती असून वाळू मिळत नसल्याने कोळसा उत्पादनात घट झाली आहे.
यापूर्वी दररोज हजारो टन कोळसा उत्पादन या खाणीतून व्हायचे. मात्र, आता खाणींना वाळूसाठा मिळत नसल्याने सद्यस्थितीत केवळ १००-१५० टन कोळसा उत्पादन होत आहे. खाणींना वाळू मिळत नसल्याचे मुख्य कारण राज्य शासनाने रेती घाटाचे लिलाव रोखून धरले आहे. कामगार काम करण्यास इच्छुक आहे. मात्र काम नाही. महागड्या मशीन धूळ खात उभ्या आहेत. कोळसा काढलेल्या खोल दरीत ढासून वाळू भरणा केल्याशिवाय पुढील काम होवू शकत नाही. यामुळे उत्पादन क्षमतावर विपरीत परिणाम होत आहे.
एकीकडे विद्युत उत्पादन केंद्र व इतर उद्योगांना कोळशाची प्रचंड गरज आहेत. शासन म्हणतो कोळसा उत्पादन वाढवा. कोळशाची प्रचंड मागणी आहे. आणि दुसरीकडे नदी पात्रातील वाळूची उचल करण्याची परवानगी मिळत नसल्याने कोळश्याचे उत्पादन घटले आहे. याकडे लक्ष देण्याची मागणी आहे. (वार्ताहर)