देवाडा बुज : पोभुर्णा तालुक्यातील अवघड क्षेत्राअंतर्गत येत असलेल्या देवाडा बुज याठिकाणी अवैध रेती वाहतूक करणारा रिकामा ट्रॅक्टर गावाजवळील वळणावरून खाली घसरल्याने चक्क संजय चुदरी यांच्या झाेपडीत घुसून पलटी झाला. सुदैवाने जीवितहानी टळली. ही घटना बुधवारी रात्री ३ वाजण्याच्या सुमारास घडली.
जुनगाव वैनगंगा नदी घाटावरून अवैध रेतीची जोमात तस्करी होत असून भरधाव वेगाने ही वाहने चालविली जातात. अशातच एक ट्रॅक्टर रेती खाली करून येत असताना जुनगाव गावालगतच्या वळणाजवळ चालकाचे वाहनावरील नियंत्रण सुटल्याने ट्रॅक्टर चुदरी यांच्या झोपडीत शिरला. परंतु कुठल्याही प्रकारची जीवितहानी जरी झाली नसली तरीपण ग्रामपंचायतीने लावलेला हागणदारी मुक्त फलक तुटला. ट्रॅक्टरची या दरम्यान वीज खांबाला धडक बसल्याने काही वेळासाठी नवीन वस्ती हेटी येथील विद्युत पुरवठा खंडित झाला होता. संबंधित ट्रॅक्टर चालक हा जुनगाव येथील असल्याचे समजते.