घुग्घुस ; वेकोलिच्या घुग्घुस कामगार वसाहतमधील अभियांत्रिकी महाविद्यालयातील विद्यार्थी शुभमचा अपहरणाच्या पाचव्या दिवशीही शोध न लागल्याने कामगार वसाहतमधील रहिवासी चिंताग्रस्त झाले आहेत.
पाच दिवस लोटूनही पोलिसांच्या तपासाला यश आले नाही. पोलिसांकडून तपासाबाबत अतिशय गुप्तता पाळण्यात येत असल्याने पोलिसांच्या तपासावर प्रश्नचिन्ह लागले आहे. शुभमच्या वडिलांची मित्रमंडळीसुद्धा घुग्घुस, चंद्रपूर, भद्रावती, वणी परिसर पिंजून काढत आहे.
रामनगर वसाहतमधील दिलीप फुटाणे यांचा मुलगा शुभम हा रविवारी सायंकाळी घरून गेला. त्यानंतर भ्रमणसेवेवरून रात्री ८.३० वाजताच्या दरम्यान अपहरण आणि दोन दिवसात ३० लाख रुपये खंडणीची मागणी करण्यात आली. मुलाच्या वडिलांच्या तक्रारीवरून गुन्हा दाखल करून पोलिसांनी तत्काळ तपास चक्रे फिरविली. विविध दिशेने घुग्घुस, चंद्रपूर पोलिसांचे पथक शुभमच्या शोधात आहे. मात्र त्याचा शोध लागला नाही. शुभमच्या आप्तमित्रांनीसुद्धा हा परिसर पिंजून काढला. मात्र त्याचा शोध किंवा सुगावा लागला नाही.
रविवारी त्या भ्रमणसेवेचे लोकेशन चंद्रपूर रस्त्यावरील घुग्घुसनजीकच्या एक पेट्रोल पंपाजवळ मिळाल्याचे समजते. मात्र त्यानंतर भ्रमणसेवेचे लोकेशन मिळाले नाही. जसे दिवस लोटत आहेत, तसे अपहरणाबाबत तर्कवितर्क लावले जात आहे. पोलीस तपासाबाबत अतिशय गुप्तता बाळगत असल्याने पोलीस कोणत्या दिशेने तपास करीत आहेत, हे कळत नाही. मात्र शुभमच्या अपहरणाने रामनगर कामगार वसाहतीमधील कामगार चिंताग्रस्त झाले आहेत.