मोताळ्यात पुन्हा खाद्य तेलाची चोरी

खाद्य तेलाचे पाच बॅरल अज्ञात चोरट्यांनी लंपास केल्याची घटना २८ मेच्या मध्यरात्री दरम्यान घडली आहे.

मोताळा : मोताळा-नांदुरा रोडवरील गजानन किराणासह आठवडी बाजार परिसरातील दोन दुकानांसमोर असलेले खाद्य तेलाचे पाच बॅरल अज्ञात चोरट्यांनी लंपास केल्याची घटना २८ मेच्या मध्यरात्री दरम्यान घडली आहे. सकाळी उघडकीस आलेल्या खाद्य तेल चोरीच्या या दुसर्‍या घटनेत चोरट्यांनी जवळपास ६८ हजारांच्या तेलावर डल्ला मारत बोराखेडी पोलिसांना पुन्हा एकदा आव्हान केले आहे. यासंदर्भात सविस्तर वृत्त असे की, मंगळवारी रात्री दोन ते तीन वाजेच्या दरम्यान अज्ञात चोरट्यांनी स्थानिक वार्ड क्रमांक १ मधील, मोताळा-नांदुरा रोडवरील गजानन बोदडे यांचे गजानन किराणा दुकानासमोरून एक बॅरल, आठवडी बाजार परिसरातील जयराज सचदेव यांचे राधास्वामी किराणा दुकानासमोरून तीन बॅरल व जीवन बिसन सांगळे यांचे ङ्म्रीकृष्ण किराणा दुकानासमोरून एक असे एकूण पाच सोयाबीन खाद्य तेलाचे भरलेले बॅरल लंपास केले. एकाच रात्री चोरट्यांनी चारचाकी वाहनातून नियोजनात्मक पद्धतीने खाद्य तेल लंपास केल्याची बाब सीसी कॅमेर्‍याच्या फुटेजवरून पोलिसांच्या लक्षात आली आहे. चोरट्यांनी लंपास केलेल्या खाद्य तेलाच्या प्रत्येक बॅरलमध्ये प्रति बॅरल १८0 किलो सोयाबीनचे खाद्य तेल असून, जवळपास ९00 किलो खाद्य तेल चोरीस गेले आहे. कोणत्याही प्रकारची तोड-फोड व वाजागाजा न करता झालेल्या या चोरीमध्ये गजानन बोदडे यांचे १३ हजार ५00 रूपये, जयराज सचदेव यांचे ४0 हजार ५00 रूपये तर जीवन सांगळे यांचे १३ हजार ५00 रूपये असे एकूण ६७ हजार ५00 रूपयाचे नुकसान झाले आहे. गेल्या १५ मार्चच्या रात्रीसुद्धा अश्याच प्रकारे बाजारातील रफिकखान नथ्थेखान यांच्या दुकानासमोर ठेवलेले तीन तेलाचे बॅरल चोरट्यांनी लंपास करून ४१ हजाराचे नुकसान केले होते. त्याचा पोलिसांकडून अद्याप तपास लागलेला नसताना २८ मेच्या रात्री पुन्हा अज्ञात चोरट्यांनी संधी साधून व्यावसायिकांमध्ये खळबळ उडवून दिली आहे. मंगळवारच्या रात्री झालेल्या या चोरीदरम्यान चोरांनी जाता-जाता पुन्हा बाजारातील रफिकखान नथ्थेखान यांच्या दुकानात चोरी करण्याचा प्रयत्न केला; परंतु मागच्या चोरीचा अनुभव पाहता रफिकखान हे दुकानात झोपलेले होते. दुकानासमोर ठेवलेले खाद्य तेलाचे बॅरल उचलतेवेळी आवाज आल्यामुळे ते जोराने ओरडले होते. त्यांचा आवाज ऐकून चोर वाहनासह पळून गेले. या घटनेची माहिती तत्काळ रफिकखान यांनी बोराखेडी पोलिसांना दिली होती; परंतु कोणताही फायदा झाला नाही. या चोरीबाबत किराणा दुकानाचे मालकांनी पोलिसांना माहिती कळविली असून, परिसरातील बिट जमादारांनी घटनास्थळावर येऊन पंचनामा केला आहे. आठवडी बाजारातील जयराज सचदेव यांच्या दुकानालगतच भाई अजीज दाऊद यांच्या दुकान परिसरात सीसी कॅमेरे लावलेले आहेत. या कॅमेर्‍यामध्ये जयराज सचदेव यांच्या राधास्वामी किराणा दुकानासमोरून खाद्य तेल चोरत असतानाच्या चोरांच्या हालचाली कैद झालेल्या आहेत. या फुटेजवरून बोराखेडी पोलिस चोरांचा मागोवा काढण्याच्या प्रयत्नात आहेत; मात्र पोलिसांची रात्रीची गस्त कमी झाल्याने चोरट्यांना चोरी करण्याचे धाडस निर्माण होत असल्याचे शहरवासीयांमध्ये बोलल्या जात आहे. चोरीच्या वाढत्या घटनांवर आळा बसविण्यासाठी रात्रीच्या वेळी पोलिस बंदोबस्त वाढवावा, अशी मागणी होत आहे.