बुलडाणा जिल्हा परिषदेचे आठ कोटी ३३ लाख शिलकीचे अंदाजपत्रक सादर

ग्रामीण पाणीपुरवठा व महिला बालकल्याणसाठी भरीव तरतूद.

बुलडाणा : जिल्हा परिषदेच्या शिवाजी सभागृहात २0१५-१६ या आर्थिक वर्षाचे ८ कोटी ३३ लाख रुपये शिलकी अंदाजपत्रक २७ मार्च रोजी सादर करण्यात आले आहे. शासनाने विहित केलेल्या टक्केवारीनुसार मागासवर्गीयांच्या कल्याणकारी योजनांसाठी उत्पन्नाच्या वीस टक्के, तर समाज कल्याण व महिला आणि बालकांच्या कल्याणकारी योजनांसाठी १0 टक्के निधी तसेच ग्रामीण पाणीपुरवठा योजनांसाठी वीस टक्के निधीची या अंदाजपत्रकात तरतूद करण्यात आली आहे. जिल्हा परिषदेच्या सभागृहात अर्थ व बांधकाम सभापती अंकुशराव वाघ यांनी २0१४-१५ या आर्थिक वर्षाचे अंदाजपत्रक सादर केले. यावेळी जिल्हा परिषदेच्या मुख्य कार्यकारी अधिकारी दीपा मुधोळ, अध्यक्ष अलका खंडारे, उपाध्यक्ष पांडुरंग खेडेकर यासह सभापती, अतिरिक्त मुख्य कार्यकारी अधिकारी, सदस्य व विविध विभागाचे विभाग प्रमुख उपस्थित होते. जिल्हा परिषदेचे महसुली व भांडवल ३९ कोटी ७९ लाख ३९ असून त्यामध्ये महसूल २७ कोटी ८४ लाख ९0 हजार २६२ व भांडवली ११ कोटी ९४ लाख ४९ हजार ६३२ रुपये असे आहे, तर अंदाजपत्रकानुसार अपेक्षीत खर्च ३१ कोटी ४५ लाख ९४ हजार असून, त्यामध्ये महसुली २२ कोटी ९४ हजार ४0 हजार ९00 तर भांडवली खर्च ८ कोटी ५१ लाख ५४ हजार रुपयांचा समावेश आहे. या अंदाजपत्रकात समाज कल्याण विभागांतर्गत मागासवर्गीय शेतकर्‍यांना ताडपत्री व शेतीची अवजारे, वीज पंप, शेती उपयोगी अवजारे तसेच वैयक्तिक लाभाच्या योजनांसाठी ४ कोटी ५५ लाख रुपयांची भरीव तरतूद करण्यात आली आहे; तसेच ग्रामीण भागातील पाणीपुरवठा योजनेसाठी १२ कोटी ८२ लाख ६९ हजार रुपयांची तरतूद करण्यात आली आहे, तर मागील वर्षी या योजनांवर ६ कोटी ४३ लाख ७0 हजार रुपयांची तरतूद करण्यात आली होती. यावर्षी ग्रामीण पाणीपुरवठा योजनांवर जवळपास सात कोटी रुपयांची वाढ या अंदाजपत्रकात करण्यात आली आहे. अपंगाच्या कल्याणासाठी एक कोटी ३५ लाख रुपये, जिल्ह्यातील दुर्धर आजारग्रस्त रुग्णांसाठी १५ लाख, महिला व बालकल्याण योजनेंतर्गत महिला व मुलींच्या प्रशिक्षणासाठी त्या विभागाचा पन्नास टक्के निधी ठेवण्यात आला असून, तो १ कोटी ५५ लाख २५ हजार एवढा आहे. इतर कृषी कार्यक्रमासाठी १ कोटी ६९ लाख ५८ हजार, पशु संवर्धन, दुग्ध व्यवसाय व कुक्कुटपालनासाठी ७६ लाख ५0 हजार, ग्रामीण भागातील रस्ते बांधकाम व दुरूस्तीसाठी ५0 कोटी, सामाजिक सुरक्षा आणि कल्याणासाठी ३ कोटी २0 लाख, पाणीपुरवठा व स्वच्छतेसाठी ५३ लाख ६0 हजार, सार्वजनिक आरोग्यासाठी ९३ लाख ७१ हजार, जिल्हा परिषदेच्या सार्वजनिक मालमत्तेच्या दुरुस्ती व बांधणीसाठी १ कोटी ४७ लाख, पंचायत राज कार्यक्रमासाठी दोन कोटी ७३ लाख ८१ हजार, शालेय विद्यार्थ्यांना सोई-सुविधा उपलब्ध व्हाव्यात, यासाठी शैक्षणिक साधन सामग्रीसह शाळा दुरूस्तीसाठी ८४ लाख २८ हजार रुपयांची तरतूद करण्यात आली आहे; तसेच आदर्श ग्रामसेवक, अंगणवाडी सेविका व संत गाडगेबाबा पुरस्कारप्राप्त ग्रामपंचायतीसाठी भरीव तरतूद करण्यात आली आहे.