सोयाबीनच्या पेर्‍यात वाढ; कापूस घटणार

गत वर्षाच्या तुलनेत सोयाबीनच्या पेर्‍यात वाढ झाली आहे. तर कापूस पेर्‍यात घट होण्याची शक्यता आहे.

बुलडाणा : वरूणदेवाचे आगमन लवकर होणार असल्याने जिल्ह्यातील बहुतांश शेतकर्‍यांनी पेरणीपूर्व मशागतीची कामे सुरु केली आहेत. जिल्ह्यात खरीप पेरणीचे एकूण क्षेत्र ९.६७ लक्ष हेक्टर आहे. यात ७.४९ लाख हेक्टरवर खरिपाच्या पेरणीचे नियोजन कृषी अधीक्षक अधिकारी कार्यालयाने केले आहे. तर सात लाख ४८ हजार हेक्टरवर खरिपाची पेरणी होण्याची शक्यता आहे. यात गत वर्षाच्या तुलनेत सोयाबीनच्या पेर्‍यात वाढ झाली आहे. तर कापूस पेर्‍यात घट होण्याची शक्यता आहे. गतवर्षी सोयाबीन आणि कापसाच्या निर्धारित केलेल्या क्षेत्रामध्ये सरासरी उत्पादकता कमी आली होती. यामुळे हे दोन्ही क्षेत्रात यंदा घट होण्याची शक्यता कृषी विभागाला होती; मात्र खरिपाच्या पेरणीसाठी यंदाही शेतकर्‍याने कापूस आणि सोयाबीनच्या पेरणीलाच जास्त पसंती दर्शविली. बुलडाणा जिल्ह्यात खरीप पेरणीसाठी प्रभावित क्षेत्र सात लाख ४९ हजार ८९३ हेक्टर एवढे आहे. यात यावर्षी ज्वार, बाजरी, मका, तूर, मूग, उडीद, सूर्यफूल, तीळ, सोयाबीन, कापूस आदी पिकांचे नियोजन करण्यात आले आहे. जिल्ह्यातील १३ तालुक्यात गत वर्षी सोयाबीनची पेरणी २६६९२९ हेक्टर क्षेत्रात करण्यात आली होती. यावर्षी सोयाबीन पेरणीसाठी तीन लाख ६१ हजार ८९0 हेक्टरचे नियोजन करण्यात आले आहे. गत वर्षीच्या तुलनेत हे पेरणी क्षेत्र जास्त आहे. तर तूर, मूग, उडिद आणि इतर कडधान्यासाठी पिकासाठी एकूण १ लाख १९ हजार ५५२ हेक्टर क्षेत्र प्रस्तावित आहे. जिल्ह्यात काही ठिकाणी तुरळक स्वरुपाच्या पावसाला सुरूवात झाली असून, शेतकर्‍यांची शेती मशागतीची कामे सुरू आहेत. तर काही शेतकरी बी-बियाणे घेण्यात मग्न आहेत.