ई-क्लास जमिनीवर अतिक्रमणाचा प्रयत्न

गावक-यांनी केले काम बंद; सरपंच व सचिवाची महसूलकडे तक्रार.

खामगाव : शिरसगाव देशमुख गट ग्रामपंचायतअंतर्गत ३ ते ४ एकराच्या परिसरात काळा साबू बनविण्याची फॅक्टरी लावण्याच्या उद्देशाने साखरखेर्डा येथील एका इसमाने काम सुरू केले. सदर काम काही गावकर्‍यांनी बंद पाडले. तसेच याबाबत माहिती मिळाल्यानंतर जमीन ग्रामपंचायतीची ई-क्लासची असून, अतिक्रमण करणार्‍यावर कडक कारवाई करावी, अशी मागणी गावच्या सरपंच सोनाली अनिल देशमुख व ग्रामसेवक मोरे यांनी तहसीलदार यांच्याकडे ३0 मे रोजी केली आहे. खामगाव-चिखली रोडला लागून असलेल्या जनता नगर भागातील पूर्वेला ग्रामपंचायतीच्या ई-क्लास जमिनीवर काळा साबू बनविण्याची फॅक्टरी लावण्याच्या उद्देशाने दोन-तीन दिवसांपासून साखरखेर्डा येथील एका इसमाकडून जेसीबीने खड्डे खोदकाम सुरू होते. ३ ते ४ एकराच्या आवारात ग्रामपंचायतीच्या जमिनीवर अवैधरित्या कब्जा करून खोदकाम सुरू असल्याचे समजल्यानंतर जनता नगर व माथनी येथील काही नागरिकांनी तेथे जाऊन काम बंद केले. दरम्यान, पटवारी राठोड, पटवारी तायडे, ग्रामसेवक मोरे यांनी घटनास्थळावर भेट देऊन या ठिकाणचे फोटोग्राफ काढले. तसेच याबाबत ग्रामपंचायतच्या ई-क्लास जमिनीवर कोणी अज्ञात इसमाने अतिक्रमण करून मोठमोठे खड्डे पाडल्याची तक्रार सरपंच सोनाली देशमुख, ग्रामसेवक मोरे यांनी तहसीलदार खामगाव यांच्याकडे ३0 मे रोजी केली आहे. शिरसगाव गट ग्रामपंचायत अंतर्गत ई-क्लासच्या जमिनीवर अनेकांचा डोळा आहे. त्यातूनच हा प्रकार घडला असल्याचे बोलले जात आहे. काही अनुचित प्रकार घडू नाही यासाठी प्रशासनाने त्वरित दखल घेण्याची गरज आहे.