दुष्काळाचा मदतनिधी थेट बँक खात्यात

पहिल्या टप्प्यात मिळाले ११९ कोटी; बुलडाणा जिल्हाधिका-यांनी तत्काळ वितरित केला तालुकास्तरावर निधी.

बुलडाणा : अपुरा पाऊस, लांबलेली पेरणी, त्यानंतर परतीच्या पावसाने दिलेला फटका व ऐन पीक काढणीच्या वेळी आलेली गारपीट अशा नैसर्गिक संकटामुळे दुष्काळात सापडलेल्या शेतकर्‍यांसाठी शासनाने जाहीर केलेल्या मदतीमधील ११९ कोटी ७४ लाखाचा निधी १0 जानेवारीला जिल्ह्याला प्राप्त झाला आहे. हा निधी जिल्हाधिकारी किरण कुरूंदकर यांनी आजच तत्काळ तालुकास्तरावर वितरीत केला असून, ही मदत संबंधित शेतकर्‍यांच्या बँक खात्यात जमा करण्याचे निर्देश देण्यात आले आहेत. यावर्षीच्या खरीप हंगामात अत्यल्प पाऊस झाल्याने जिल्ह्यात मूग, उडीद, ज्वारी इत्यादी पिके शेतकर्‍यांच्या हातून गेली, तसेच कापूस, सोयाबीन पिकाचे उत्पादन घटले. खरिपाची सरासरी आणेवारी ५0 पैशाखाली असल्याने दुष्काळी परिस्थितीत जिल्ह्यातील तेराही तालुक्यांमध्ये दुष्काळ जाहीर करण्यात आला आहे. ५ लाख ४८ हजार ६६७ लाख शेतकर्‍यांना या दुष्काळाचा फटका बसला आहे. या शेतकर्‍यांना एकूण २८७ कोटी ९४ लाखांची मदत जाहीर करण्यात आली असून, त्यापैकी ११९ कोटी ७४ लाखांची मदत प्राप्त झाली आहे.