अल्प उत्पन्नात बुलडाणेकरांचे घराचे स्वप्न साकारणार!

हर्षवर्धन सपकाळ यांचा पाठपुरावा : म्हाडाच्या ३०४ घरांचा प्रकल्प मंजूर

बुलडाणा : तब्बल सहा वर्षांपासून रखडलेला महाराष्ट्र गृह निर्माण व क्षेत्र विकास मंडळाच्या बुलडाणा येथील गृह निर्माण योजनेचा महत्त्वाकांक्षी प्रकल्प आ. हर्षवर्धन सपकाळ यांनी मार्गी लावला असून, या माध्यमातून बुलडाणेकरांना ३०४ घरे पंतप्रधान आवास योजनेच्या माध्यमातून उपलब्ध होणार आहेत. अंदाजे २० कोटी रुपये खर्चाच्या या प्रकल्पास शासनाची मंजुरी मिळाली आहे.बुलडाणा नागरी क्षेत्रासाठी महाराष्ट्र गृह निर्माण व क्षेत्र विकास मंडळातर्फे सन २०१० मध्ये गृह निर्माण योजनेसाठी शेत सर्व्हे क्रमांक ५२ व ५३ मधील सुमारे चार हेक्टर जमीन खरेदी करण्यात आलेली होती. तथापि सदर जमिनीवर उभारावयाचा गृह निर्माण प्रकल्प मात्र रखडलेला होता. यामुळे बुलडाणा शहरातील अनेक अल्प उत्पन्न गटातील कुटुंबे हक्काच्या घरापासून अनेक वर्षापासून वंचित राहिलेली आहेत. या पार्श्वभूमीवर आ. सपकाळ यांनी गृह निर्माण मंत्रालयाकडे पाठपुरावा सुरू केला होता. सोबतच सन २०१६ मध्ये विधिमंडळाच्या अर्थसंकल्पीय व पावसाळी अधिवेशनात सूचनासुद्धा सादर केल्या. तसेच विधिमंडळ पातळीवर पाठपुरावा सुरू ठेवला होता.दरम्यान, आ. सपकाळ यांच्या सातत्यपूर्ण पाठपुराव्यामुळे अल्प उत्पन्न गटातील बुलडाणेकरांचे हक्काच्या घराचे स्वप्न लवकरच पूर्ण होणार आहे. म्हाडाच्या सदर प्रकल्पास पंतप्रधान आवास योजनेंतर्गत २० कोटी रुपये मंजूर झाले असून, त्यामध्ये ३०४ घरांची उभारणी केली जाणार आहे. या ३०४ पैकी २६८ घरे ही अल्प उत्पन्न गटासाठी प्राधान्याने देण्यात येणार आहेत. मध्यम उत्पन्न गटासाठी २० व उच्च उत्पन्न गटासाठी १६ घरांची उभारणी होणार आहे. आ. हर्षवर्धन सपकाळ यांच्या सातत्यपूर्ण पाठपुराव्यामुळे हक्काच्या घराचे स्वप्न पूर्ण करण्याची संधी अल्प उत्पन्न गटातील कुटुंबांना चालून आली आहे. विशेष उल्लेखनीय असे की, यामध्ये निकषपात्र ठरणाऱ्या अल्प उत्पन्न गटातील कुटुंबास केंद्र शासनाचे दीड लाख, तर राज्य शासनाचे एक लाख असे अडीच लाख रुपये अनुदानसुद्धा या घरासाठी मिळणार आहे.