विद्यार्थिनीला परीक्षा केंद्रावरून हाकलले

तुमसर येथील एका महाविद्यालयीन परीक्षा केंद्रावर कॉपी तपासताना एका परीक्षार्थी विद्यार्थिनीला कारवाईचा धाक दाखविण्यात आला.

दुसऱ्या पेपरला बसू दिले नाही : प्रकरणाची चौकशी करून कारवाईची मागणीतुमसर : तुमसर येथील एका महाविद्यालयीन परीक्षा केंद्रावर कॉपी तपासताना एका परीक्षार्थी विद्यार्थिनीला कारवाईचा धाक दाखविण्यात आला. संबंधित युवतीला दुसऱ्या पेपरला बसू न देता परीक्षा केंद्रावरून परत पाठविण्यात आले. परीक्षेपासून वंचित ठेवण्याचा आरोप या विद्यार्थिनीने केला आहे. दुर्गा जसवंत गायधने (२०) रा.बघेडा असे सदर विद्यार्र्थीनीचे नाव आहे. दुर्गा गायधने ही स्थानिक एस.एन. मोर महाविद्यालयाची नियमित विद्यार्थिनी आहे. २० एप्रिल रोजी साई महाविद्यालय परीक्षा केंद्रावर बी.एस.सी. प्रथम वर्ष बॉटनी द्वितीय सेमीस्टरचा पेपर होता. तपासणीदरम्यान दुर्गाकडे कॉपी आढळल्याचा आरोप संबंधित तपासणी करणाऱ्या कर्मचाऱ्यांनी केला. कारवाई करण्याची धमकी दिली. परीक्षा केंद्रावर दार बंद करण्याचा प्रयत्न करण्यात आला. गोंधळलेल्या व भीतीमुळे दुर्गा गायधने हीे परीक्षा केंद्रातून बाहेर पडली. रसायनशास्त्र (द्वितीय)चा पेपर देण्याकरिता दुर्गा गायधने परीक्षा केंद्रावर गेली. परंतु तिला परीक्षा केंद्रातून परत पाठविण्यात आले. याप्रकरणी दुर्गाने एस.एन. मोर महाविद्यालयाच्या प्राचार्यांशी संपर्क साधून आपबिती सांगितली. परंतु त्यांनी या प्रकरणात मी काहीच करू शकत नाही, तू परत परीक्षा केंद्रावर जाऊन परीक्षा दे, असे सांगितले. परीक्षा केंद्रावर फौजदारी गुन्हा दाखल करण्याची धमकी देण्यात आली असा परीक्षार्थी दुर्गा गायधने या विद्यार्थिनीने आरोप केला आहे.बी.एस.सी. प्रथम वर्षाची परीक्षा न दिल्याने मला अंतिम वर्षात प्रवेश मिळणार नाही. माझे एक वर्ष वाया जाणार आहे. असे सांगून हे प्रकरण आमदार चरण वाघमारे, माजी आमदार अनिल बावनकर, सभापती शुभांगी राहांगडाले यांना दुर्गा गायधने हिने सांगितले. मागीलवर्षी सदर परीक्षा केंद्रावर मी प्रथम वर्षाची परीक्षा दिली होती. तेव्हा परीक्षा घेणाऱ्या अधिकारी पुन्हा यावर्षी सुद्धा त्याच परीक्षा अधिकारी म्हणून विद्यापीठाने त्यांची नियुक्ती केली. मागील वर्षी कॉपी संदर्भात संबंधित परीक्षा अधिकाऱ्यांशी माझी शाब्दीक बाचाबाची झाली होती. त्याचा बदला त्या महिला अधिकऱ्यांनी घेतल्याचा आरोप दुर्गा गायधने हिने केला आहे. तुमसर शहरात विद्यापीठ परीक्षा केंद्राचे तीन परीक्षा केंद्र आहेत. यात काही परीक्षा केंद्रावर कॉपी सुरू आहे. मर्जीतील परीक्षा केंद्रावर मर्जीचेच परीक्षा केंद्र प्रमुखांची नियुक्ती केल्याचे समजते. तुमसरात वास्तव्य असणारे व कर्तव्य जिल्हास्तरावर करणाऱ्यांची नियुक्ती तुमसर येथील परीक्षा केंद्रावर कशी करण्यात आली, एकाच परीक्षा केंद्रावर सलग दुसऱ्यावर्षी परीक्षा केंद्र प्रमुखपदी कशी नियुक्ती करण्यात आली हा संशोधनाचा विषय आहे. (तालुका प्रतिनिधी)