प्रशिक्षितांकडून होणार घरगुती गॅस जोडणीची पाहणी

घरगुती गॅस वापरादरम्यान होणारे अपघात टाळण्यासाठी नवनी मोहिम १५ जुलैपासून सुरू करण्यात येणार आहे. या अनुषंगाने ज्या ग्राहकांकडे एचपी व इंण्डेन कंपनीचे गॅस कनेक्शन आहे,

भंडारा : घरगुती गॅस वापरादरम्यान होणारे अपघात टाळण्यासाठी नवनी मोहिम १५ जुलैपासून सुरू करण्यात येणार आहे. या अनुषंगाने ज्या ग्राहकांकडे एचपी व इंण्डेन कंपनीचे गॅस कनेक्शन आहे, अशा गॅसधारकांच्या कनेक्शनचे निरीक्षण कंपनीच्या प्रशिक्षित प्रतिनिधींकडून करण्यात येणार आहे. यामुळे घरगुती गॅस वापरादरम्यान होणाऱ्या अपघातावर नियंत्रण मिळविण्यात मोठ्या प्रमाणात यश मिळणार असल्याने गॅस धारकांच्या सुरक्षिततेसाठीच गॅस कंपण्यांचा हा पुढाकार म्हणावा लागेल.
काही दिवसांपूर्वी पवनी तालुक्यात भुयार या गावात घरगुती गॅस सिलिंडरच्या स्फोटामुळे तीन लोकांचा मृत्यू झाला होता. यामागील कारणाचा शोध घेतला असता गॅस कनेक्शन वापरताना आयएसआय प्रमाणित नसलेल्या उपकरणांचा वापर केला असल्याची बाब पुढे आली होती. त्यामुळे भविष्यात अशा प्रकारच्या दुर्घटना टाळण्यासाठी हिंदुस्तान पेट्रोलियम कार्पेरेशन व इंडियन आॅईल कॉर्पाेरेशनद्वारे प्रत्येक घरगुती गॅसधारकांच्या कनेक्शनची तपासणी करण्याचा निर्णय घेतला आहे.
भंडारा, लाखनी, पवनी, साकोली या तालुक्यात १५ जुलैपासून हा उपक्रम राबविण्यात येणार आहे. या अनुषंगाने कंपनीचे प्रशिक्षित प्रतिनिधी घरोघरी जाऊन अत्यल्प दरात गॅसधारकांना साहित्याची व सुरक्षिततेविषयी माहिती देणार आहे. गॅस वापरताना आयएसआय प्रमाणित उपकरणांचा वापर सुरक्षेच्या दृष्टीने आवश्यक असल्याने ज्या ग्राहकांकडे आयएसआय उपकरणे नसतील त्यांना त्वरित उपकरणे बदलवून दिले जाणार आहेत.
यासाठी कंपनीची रितसर पावतीही ग्राहकांना देण्यात येणार आहे. आॅईल कंपन्याकडून घरगुती ग्राहकांचा अपघातादरम्यान थर्ड पार्टी विमा कंपनीकडूनच काढण्यात येतो. ज्या ग्राहकाने कंपनीच्या निरीक्षणाना प्रतिसाद दिला नाही, त्या ग्राहकांना या विमा योजनेचा लाभ घेता येणार नाही. त्यामुळे सुरक्षिततेच्या दृष्टीने प्रत्येक ग्राहकाने कंपनीच्या निरीक्षणाला प्रतिसाद देऊन भविष्यातील अपघात टाळावा, असे आवाहन करण्यात आले आहे. (शहर प्रतिनिधी)