सहा आरोपींविरुद्ध आरोपपत्र दाखल होणार

तुमसर रोड (देव्हाडी) येथे बनावट नोटा छपाई प्रकरणातील सहा आरोपींविरुद्ध दि. १६ रोजी नागपूर एटीएस न्यायालयात आरोपपत्र दाखल करणार आहे. नाशिक येथून नोटांचा अहवाल सोमवारपर्यंत प्राप्त होणार

प्रकरण बनावट नोटांचे : नाशिक येथून येणार अहवालतुमसर : तुमसर रोड (देव्हाडी) येथे बनावट नोटा छपाई प्रकरणातील सहा आरोपींविरुद्ध दि. १६ रोजी नागपूर एटीएस न्यायालयात आरोपपत्र दाखल करणार आहे. नाशिक येथून नोटांचा अहवाल सोमवारपर्यंत प्राप्त होणार असल्याची माहिती आहे. मुंबई येथून नोटा छपाई यंत्राची तपासणी अहवालनंतर न्यायालयात सादर केला जाणार असल्याचे कळते.दि. २४ जुलै रोजी मध्यरात्री नागपूर एटीएस पथकाने तुमसर रोड (देव्हाडी) येथून बनावट नोटा छपाईच्या यंत्रासह बंटी दवारे (२८) रा.गांधी वॉर्ड, विजय लिल्हारे (३०) रा.नेहरु वॉर्ड व छोटू मेश्राम (३०) रा.स्टेशनटोली यांना अटक केली होती. या टोळीने नागपूर येथे नकली नोटा चलनात आणल्या होत्या. त्याची सत्यता लक्षात आल्यावर एटीएसने सापळा रचला. यात नागपूर येथील गणेश उर्फ उदयसिंह निमजे याला ३ लाख २२ हजार ५०० च्या बनावट नोटा जप्त करून अटक केली होती. या प्रकरणात बनावट नोटांचे तार देव्हाडी येथे असल्याची माहिती गणेश निमजे याने तपासात दिली होती.दि. ३० आॅगस्टपर्यंत नागपूर एटीएसने आरोपींची पोलीस कोठडी घेतली होती. दरम्यान तपासात चार आरोपींपैकी नागपूर येथील दिनेश कडू व दिपक पाठराबे यांचा रॅकेटमध्ये समावेश असल्याची माहिती दिली. या सहा आरोपीविरुद्ध नागपूर एटीएस दि. १६ सप्टेंबर रोजी आरोपपत्र दाखल करीत आहे. दरम्यान नागपूर एटीएसने बनावट नोटा नाशिक व नोटा छपाई यंत्र मुंबई येथे तपासणीकरिता पाठविले आहे. यात नोटांचा अहवाल प्राप्त करण्याकरिता एटीएसचे अधिकारी नाशिकला रवाना झाले आहेत. सोमवारी रात्री अथवा मंगळवारी अहवाल नागपुरात येणार असल्याची माहिती आहे. मंगळवारी दुपारी आरोपपत्र न्यायालयात सादर करण्यात येईल. या वृताला एटीएसचे पोलीस निरीक्षक मंगेश देसाई यांनी दुजोरा दिला. नोटा छपाई अहवाल मुंबई येथून प्राप्त झाल्यावर तो न्यायालयात नंतर सादर करण्यात येईल अशी माहिती एटीएसचे मंगेश देसाई यांनी दिली. दोन महिन्यात न्यायालयात आरोपपत्र सादर करावे लागते. २४ जुलै रोजी आरोपींना अटक केल्यावर आरोपींकडून प्रत्येक बिंदूवर कसून चौकशी करण्यात आली. या प्रकरणात आरोपींविरुद्ध कलम ४८९ (क), १२० (ब) तथा ४२० भांदवीच्या अन्वये गुन्हा नोंद करण्यात आला आहे. (तालुका प्रतिनिधी)