गायरान हक्क अभियान : आंदोलनाचा इशारा
अंबाजोगाई : मौजे धानोरा खुर्द येथील मागासवर्गीय कसत असलेल्या गायरानामधील पत्र्यांचे घर जाणूनबुजून ग्रामसेवक आणि सरपंच यांनी जमीनदोस्त केल्याप्रकरणी अंबाजोगाईचे गटविकास अधिकारी या ग्रामसेवकाला अभय देत असून उपोषण करीत असलेल्या महिलांच्या मागणीकडे साफ दुर्लक्ष करीत आहेत. दरम्यान, धानोरा खुर्द येथील उपोषण करणाऱ्या महिलांनी ग्रामसेवक आणि सरपंचावर जोपर्यंत कार्यवाही होत नाही, तोपर्यंत उपोषण न सोडण्याची भूमिका घेतली आहे.
दरम्यान, या प्रकरणात गायरान हक्क अभियान, डेमोक्रॅटिक पार्टी ऑफ इंडिया यांनी उपोषणाला पाठिंबा दिला आहे, तर वंचित भूमिहीन संघर्ष समितीने आंदोलनाचा इशारा दिला आहे.
मौजे धानोरा खुर्द येथील मागासवर्गीय कसत असलेल्या गायरानामधील पत्र्यांचे घर ग्रामसेवक आणि सरपंच यांनी जमीनदोस्त केल्याप्रकरणी त्यांच्यावर ॲट्रॅासिटी ॲक्टनुसार गुन्हा दाखल करण्यात यावा आणि या ग्रामसेवकास बडतर्फ करण्यात यावे, या प्रमुख मागणीसाठी धानोरा येथील गायरानधारकांनी उपजिल्हाधिकारी कार्यालयासमोर २१ जूनपासून उपोषण सुरू केले आहे.
आम्ही धानोरा खुर्द येथील रहिवासी असून गेल्या अनेक वर्षांपासून गायरान जमिनीबाबत लढा देत आहोत. गावातील ग्रामसेवक, सरपंच यांनी इतर अतिक्रमणे सोडून जाणूनबुजून आम्ही लढा देत असलेल्या गायरान जमिनीवर झाडे लावण्याचा घाट घातला. जमिनीवर बांधलेल्या पत्र्यांचे घर पाडून त्या ठिकाणी जेसीबीने नांगरणी केली आहे.
गावात अनेकांनी गायरान जमिनी काबीज केल्या असून त्यांना सोडून दिले, असा आरोप निवेदनात केला आहे. या निवेदनावर सुरेखा वाघमारे, आशा वाघमारे, रिता कसबे, सरिता घाडगे, कोंडाबाई वाघमारे, सागरबाई वाघमारे, दैवशाला जोगदंड, मैनाबाई वाघमारे यांच्या सह्या अंगठे आहेत. यातील काही महिला वयस्कर आहेत, त्यांची प्रकृती खालावली आहे. तसा अहवाल तपासणी करणाऱ्या डॉक्टरांनी दिला आहे.
===Photopath===
220621\3010img-20210622-wa0126_14.jpg