परळी : जिल्हा नियोजन विकास समितीच्या माध्यमातून दोन वर्षांपूर्वी सुमारे १ कोटी २५ लाख रुपये खर्चून शहरातील प्रमुख चौक, रस्ते, तसेच सार्वजनिक ठिकाणी ५० सीसीटीव्ही कॅमेरे बसविण्यात आले हाते; परंतु मागील काही दिवसांपासून सीसीटीव्हीचे २३ कॅमेरे पूर्णपणे बंद असून ही यंत्रणा कोलमडली आहे. परळी वैद्यनाथ शहरातील बंद पडलेल्या सीसीटीव्ही कॅमेरा यंत्रणेकडे रा. कॉ. जिल्हा उपाध्यक्ष चंदूलाल बियाणी यांनी बीड जिल्हा पोलीस अधीक्षकांचे एका निवेदनाद्वारे लक्ष वेधले आहे.
शहरात कॅमेरे प्रमुख चौक, सर्व रस्ते तसेच सार्वजनिक गर्दीच्या ठिकाणी बसविण्यात आले आहेत. दोन वर्ष कॅमेरे चालू राहिले; परंतु नंतर मात्र या यंत्रणेच्या उपयोगितेकडे प्रशासनाने लक्ष दिले नसल्याचे बियाणी यांनी निवेदनात म्हटले आहे. गुन्हेगारी रोखण्यासोबत गुन्हेगाराचा शोध घेण्यासाठी सीसीटीव्ही यंत्रणा अत्यंत उपयुक्त असताना, तसेच ही यंत्रणा पोलिसांसाठी मदतीचा हात ठरत असताना या तिसऱ्या डोळ्याकडे प्रशासनाचे दुर्लक्ष होत आहे.
शहर व ग्रामीण पोलिसांसाठी गस्त पथक वापराकरिता असलेली वाहने अत्यंत खराब असून परळी शहर व संभाजीनगर ठाण्याला नव्या अत्याधुनिक पेट्रोलिंग वाहनाची उपलब्धता करून द्यावी, असेही बियाणी यांनी या निवेदनात म्हटले आहे. या निवेदनाच्या प्रती राज्याचे सामाजिक न्याय व विशेष साहाय्यमंत्री तथा पालकमंत्री धनंजय मुंडे, जिल्हाधिकारी रवींद्र जगताप यांना देण्यात आल्या आहेत.
गुन्हेगारी रोखण्यासोबत गुन्हेगारांचा शोध घेण्यासाठी असलेली अत्याधुनिक व तेवढीच उपयुक्त यंत्रणा तातडीने पुन्हा कार्यरत करावी व पोलिसांना पेट्रोलिंगसाठी आधुनिक वाहने द्यावीत.
- चंदूलाल बियाणी, राष्ट्रवादी काँग्रेस बीड जिल्हा उपाध्यक्ष तथा जिल्हा नियोजन विकास समिती सदस्य बीड.
परळी शहरातील २३ सीसीटीव्ही कॅमेरे बंद आहेत. वायर निघणे, वीजपुरवठा न होणे आदी कारणांमुळे कॅमेरे बंद आहेत, असे पोलीस सूत्रांनी सांगितले, तर परळी शहरचे पोलीस निरीक्षक हेमंत कदम हे एक महिन्यापासून रजेवर आहेत.