अपर विभागीय आयुक्तांचा निर्णय : ग्रामसेवक निलंबित
माजलगाव : तालुक्यातील ढोरगाव येथील सरपंच यमुना ग्यानबा सरवदे यांना गावांत राबविलेल्या विविध शासकीय योजनेत कामे न करता गैरव्यवहार करून अपहार केल्याप्रकरणी अप्पर विभागीय आयुक्त बाबासाहेब बेलदार यांनी अपात्र ठरवले आहे.
तालुक्यातील ढोरगाव ग्रामपंचायतच्या सहा सदस्यांच्या तक्रारीनुसार गट विकास अधिकाऱ्यांनी चौकशी केली असता गावातील समाज मंदिरासमोरील पेवर ब्लॉक काम पूर्ण न करता ३३ हजार रुपये उचलले. जिल्हा परिषद शाळेजवळील नालीकाम अर्धवट ठेवून ४३ हजार ५०० रुपये उचलले, शाळेतील टीव्ही संचाबद्दल २२ हजार ६०० रुपये उचलले. पाणी फिल्टर नादुरूस्त प्रकरणी १९ हजार व २३ हजार रुपये उचलले. परंतु ही कामे केली नाही, तसेच दलित वस्ती सुधार योजनेत निकृष्ट सौर पथदिवे बसवले यासह विविध तक्रारीची चौकशी केली असता त्यात सत्यता आढळून आली. तसा अहवाल जिल्हा परिषद मुख्य कार्यकारी अधिकाऱ्यांना सादर करण्यात आला. त्यानंतर विभागीय आयुक्तांकडे हे प्रकरण गेले व सुनावणी झाली. सरपंचांचा खुलासा समाधानकारक नसल्याने व ते सतत गैरहजर असल्याने अखेर विभागीय विभागीय आयुक्त बाबासाहेब बेलदार यांनी ग्रामपंचायत अधिनियम १९५८ चे कलम ३९-१ नुसार सरपंच यमुना गेनबा सरवदे या पुढील काळासाठी अपात्र असल्याचा निकाल २६ मार्च रोजी दिला आहे. या निकालामुळे खळबळ उडाली आहे.
सहा सदस्यांची होती तक्रार
तालुक्यातील ढोरगाव ग्रामपंचायतच्या सुखदेव अर्जुन मुळे, यशवंत मारुती सातपुते, छगन दौलत सरवदे,दत्ता प्रकाश आबूज,शोभा भारत सातपुते, सुनीता छगन सरवदे या सदस्यांनी तक्रार दाखल केली होती. गावातील सरपंच यमुना गेनबा सरवदे व ग्रामसेवकांनी मिळून विविध कामात गैरवापर केल्याची तक्रार गटविकास अधिकाऱ्यांकडे १८ जानेवारी २०१९ रोजी केली होती.
सीईओंचा आयुक्तांकडे अहवाल
मुख्य कार्यकारी अधिकाऱ्यांनी ३१ जुलै २०२० रोजी ग्रामपंचायत अधिनियमानुसार कार्यवाहीस सरपंच पात्र असल्याचा अहवाल आयुक्तांना सादर केला होता. या बाबत ग्रामसेवकाला निलंबित करण्यात आले तसेच त्याची एक वर्षाची वेतनवाढ कायमस्वरूपी रोखण्यात आली.