रियालिटी चेक
लोकमत न्यूज नेटवर्क
बीड : अनलॉकनंतर जिल्ह्यात गेल्या पंधरा दिवसांपासून जवळपास सर्वच आगाराच्या एस. टी. बसेस सुरू झाल्या आहेत. परंतु, बसमधून प्रवास करताना मास्क मात्र नावालाच. सोशल डिस्टन्सिंग तर कुणीच पाळत नाही. एकाकडेही सॅनिटायझर नाही. चालक, वाहकही एकदा बसस्थानक सोडले की मास्क काढून टाकत आहेत. एकंदरीत आता कोरोना संपला.. बिनधास्त फिरा... असेच चित्र बस प्रवास करताना आढळून आले.
‘लोकमत’ प्रतिनिधीने बुधवारी (दि. २३ जून) दुपारी जामखेड-बीड असा एस. टी.चा दोन तास प्रवास करीत रियालिटी चेक केले. कोरोनामुळे जवळपास दोन महिने एस. टी. चाक थांबले होते. अनलॉकनंतर एसटी सुरू झाल्या. परंतु, बस सुरू करण्यासाठी कोरोना नियमांचे पालन करण्याचे सर्वांना सक्तीचे केले आहे. परंतु, बसमधून प्रवास करताना ना मास्क, ना सोशल डिस्टन्स, सॅनिटायझरचा कसलाच वापर होत नाही. बिनधास्तपणे लोक प्रवास करीत असल्याचे चित्र आहे.
...
‘लोकमत’एस.टी.चा प्रवास
जामखेड-बीड
वेळ बुधवारी दुपारी ११.४० वाजता जामखेड बसस्थानकावर पुणे-माजलगाव बस आली.
या बसमध्ये १५ प्रवासी होते. बस चालकाच्या तोंडाला मास्क होता. वाहकाच्या तोंडाला मास्कऐवजी पांढरा पंचा गुंडाळलेला होता. बसमध्ये प्रवाशांकडून चढताना, उतरताना कसलेली सोशल डिस्टन्सिंगचे पालन होत नव्हते. बसमध्ये मात्र प्रवासी सोशल डिस्टन्सिंगचे पालन करून बसले होते. कोणी तोंडाला मास्क, कोणी पंचा, कोणी रुमाल बांधला होता. महिलांनी मास्कऐवजी पदराने तोंड झाकले होते. सॅनिटायझरचा मात्र कोणाकडेच पत्ता नव्हता. जामखेड बसस्थानकातून बस ११.५० वाजता सुटली. बसमध्ये एकूण १५ प्रवासी होते. दहा मिनिटांत बस जामखेड शहराबाहेर निघाली. यानंतर मोकळी हवा घेण्यासाठी सर्वांनी मास्क खाली केले. काहींनी काढून ठेवले. ते बीडला येईपर्यंत. येथे उतरताना मात्र सर्वांना पुन्हा मास्क लावले. यात चालक, वाहकही मागे नव्हते.
.....
प्रवाशांची चढउतार
११.४० - जामखेड बसस्थानकावर पाच प्रवासी उतरले. दोन प्रवासी चढले. सर्वांच्या तोंडावर मास्क होते.
१२.१५ - साैताडा, वांजरा फाटा - एकाही प्रवाशांची चढ उतार नाही.
१२.३५ - रोहोतवाडी - एक प्रवासी उतरला.
१.०० - लिंबादेवी - एक प्रवासी चढला. तोंडावर मास्क आढळून आला.
१.१४ - चऱ्हाटा येथे १ प्रवासी चढला. तोंडावर पंचा बांधलेला होता.
१.२० मिनिटांनी बीड बसस्थानकावर जवळपास सर्वच प्रवासी उतरले. सर्वांनी उतरताना मास्क लावले.
...
चालक - बस चालकाच्या तोंडावर जामखेड स्थानकातून बस सुटल्यानंतर १५ मिनिटे मास्क लावलेला होता. त्यानंतर बीड शहराजवळ बस असल्यानंतरच मास्क लावला.
...
वाहक - तिकीट बुकिंग करेपर्यंत तोंडाला पंचा गुंडाळला होता. त्यानंतर १० मिनिटेच तोंड बांधलेले होते. यानंतर मात्र बीड जवळ आल्यानंतरच पुन्हा पंचा तोंडाला गुंडाळला.
...
प्रवासी - जामखेडपासून बीडपर्यंत जवळपास सर्वच प्रवाशांच्या तोंडाला मास्क, पंचा, रूमाल होते. बस सुटताच सर्वांनी बाजूला केेले होते. बीड शहरात प्रवेश करताच पु्न्हा तोंडावर मास्क लावले. यात तीन महिला प्रवास करीत होत्या. त्यांच्याकडे मास्क नव्हता. त्या पदरानेच तोंड झाकत होत्या.
...