लोकमत न्यूज नेटवर्क
बीड : जिल्ह्यात कोरोनाची रुग्णसंख्या कमी होत असल्याने काहीसा दिलासा मिळत होता; परंतु ‘म्युकरमायकोसिस’ या आजाराचे रुग्ण झपाट्याने वाढत असल्याने चिंता व्यक्त होत आहे. हा आजार संपर्कातून होत नसल्याचे मत वैद्यकीय तज्ज्ञांनी व्यक्त केले असले तरी केवळ गाफील राहिल्याने आतापर्यंत रुग्णसंख्या शतकपार गेली आहे. जिल्ह्यात एकूण रुग्णसंख्या १०३ एवढी झाली असून, १६ जणांचा बळी गेला आहे. एकीकडे रुग्णसंख्या वाढत असून, दुसऱ्या बाजूला आरोग्य यंत्रणेकडे ईएनटी, नेत्र व दंततज्ज्ञांचा तुटवडा असल्याचे समोर आले आहे.
जिल्ह्यात १३ मे रोजी ‘म्युकरमायकोसिस’चा पहिला रुग्ण आढळला होता. तेव्हापासून रुग्णसंख्या झपाट्याने वाढत आहे. यातील १०२ रुग्णांना कोरोनाचा इतिहास असल्याचे समोर आले आहे. तसेच आढळलेल्या एकूण रुग्णांमध्ये ६० वर्षांवरील तब्बल ४१ जणांचा समावेश आहे. त्यापाठोपाठ ४५ ते ६० वयोगटांतील ३५, १८ ते ४५ मधील २६ आणि १८ वर्षांखाली केवळ एका रुग्णाचा समावेश आहे. तसेच ६६ पुरुष रुग्ण असून, ३७ महिलांचा समावेश आहे. हा आजार वाढत असल्याने प्रत्येकाने काळजी घेण्याचे आवाहन करण्यात आले आहे.
औषधींचा पुरेसा साठा कधी मिळणार? गंभीर प्रश्न
या आजारावरील औषधी पुरेसे उपलब्ध नसल्याचे समोर आले आहे. आरोग्य विभागाकडून मागणी केली आहे.
अगोदरच औषधी महागडी आहेत, त्यातही तुटवडा असल्याने नातेवाइकांसमोर पेच निर्माण झाला.
औषधी वेळेवर उपलब्ध होत नसल्यानेही रुग्णांचा मृत्यू हाेत असल्याचा आरोप सामान्यांमधून केला जात आहे.
म्युकरमायकोसिस प्राथमिक लक्षणे
डोळ्यांभोवती वेदना होणे, डोळे लाल होणे, ताप येणे, डोकेदुखी, खोकला, श्वास घेण्यास त्रास होणे, रक्ताच्या उलट्या होणे, मानसिक स्थिती बदलणे, गाल दुखणे/सुजणे, डोळे दुखणे, सुजणे, दृष्टी अधू होणे, डोळ्यांपुढे दोन प्रतिमा दिसणे, नाक दुखणे व ते सतत वाहू लागणे, दात हलू लागणे, अशी लक्षणे आहेत.
ही घ्या काळजी
जे ऑक्सिजनवर होते आणि नुकतेच कोरोनामुक्त झालेले आहेत त्यांनी विशेष काळजी घ्यावी. मधुमेही व्यक्तींनी रक्तातील साखरेचे प्रमाण नियमित तपासावे. मास्क नियमित व स्वच्छ वापरावा. वैयक्तिक स्वच्छतेकडे विशेष लक्ष द्यावे. तसेच आपण तरुण आहोत, आपल्याला काही होत नाही, हा गैरसमज मनातून काढावा.
डॉक्टर म्हणतात
डायबेटीज असेल तर जास्त काळजी घ्यावी. कोरोनाचा रुग्ण असेल आणि जेवताना दात दुखत असेल, भूवयाच्यावर दुखत असेल तर तत्काळ डॉक्टरांना दाखवावे. हा आजार कोणत्याही वयोगटातील लोकांना होऊ शकतो.
-डॉ. विशाल कोटेचा फिजिशियन
म्युकरमायकोसिस हा आजार संपर्कातून होत नाही. मागील काही दिवसांपासून रुग्णसंख्या वाढत आहे. सर्वांना कोरोनाचा इतिहास आहे. त्यामुळे कोरोना झालेल्यांनी जास्त काळजी घ्यावी. थोडेही लक्षणे जाणवायला सुरुवात झाली की तत्काळ तज्ज्ञांचा सल्ला घ्यावा.
डॉ. बाबासाहेब ढाकणे, नोडल ऑफिसर
या आजारासंदर्भात आपल्याकडे योग्य नियोजन केले जात आहे. सरकारी डॉक्टर नसल्याने खासगी डॉक्टरांना बोलावले जात आहे. सध्या तरी स्वतंत्र वॉर्ड तयार केलेला आहे. परंतु, सर्व उपचार अंबाजोगाईच्या स्वाराती वैद्यकीय महाविद्यालयात केले जात आहेत.
-डॉ. सूर्यकांत गित्ते, सीएस, बीड