बीड : जिल्हा रुग्णालयात कोरोनाबाधितांसाठी ऑक्सिजन खाटा कमी पडत असल्याने आता बीडपासून जवळच असलेल्या चऱ्हाटा प्राथमिक आरोग्य केंद्रात १०० खाटांचे नियोजन करण्यात आले आहे. याच्या कामाला उद्या, सोमवारी सुरुवात होणार असून, आठवडाभरात या सर्व खाटा रुग्णांसाठी सज्ज होणार आहेत. आयटीआयप्रमाणेच येथील सर्व नियोजन ग्रामीण आरोग्य विभाग सांभाळणार आहे.
मागील आठवड्यापासून जिल्ह्यातील कोरोनाबाधित रुग्णांची संख्या कमी होत चालली आहे. असे असले तरी तिसरी लाट येण्याची भीती व्यक्त होत आहे. भविष्यात काही अडचणी येऊ नयेत, यासाठी आरोग्य यंत्रणा आतापासूनच कामाला लागली आहे. मुख्य कार्यकारी अधिकारी अजित कुंभार व जिल्हा आरोग्याधिकारी डॉ. आर. बी. पवार यांनी चऱ्हाटा येथे नव्यानेच तयार झालेले प्राथमिक आरोग्य केंद्राची पाहणी केली. नवी इमारत आणि शहरापासून जवळच असल्याने येथे डेडिकेटेड हेल्थ सेंटर सुरू करण्याचा निर्णय घेतला. येथे तब्बल १०० ऑक्सिजन खाटांचे नियोजन असणार आहे. येथे सर्व डॉक्टर, कर्मचारी हे ग्रामीण आरोग्य विभागातील असणार आहेत. तसेच काही कोविडसाठी विशेष भरती केली जाणार असल्याचे सूत्रांकडून सांगण्यात आले.
सीईओ, डीएचओंचे नियोजन यशस्वी
जिल्हा रुग्णालयात खाटा अपुऱ्या पडत असल्याने अजित कुंभार यांनी बाजूच्या नर्सिंग हॉस्टेलमध्ये २२० खाटांची व्यवस्था केली. तसेच परिसरातील इमारतींमध्येही ऑक्सिजन बेड तयार केले. ३२० खाटांच्या जिल्हा रुग्णालयात तब्बल ७२० खाटा तयार करण्यात आल्या. या खाटाही अपुऱ्या पडल्याने आयटीआयमधील सीसीसी बंद करून येथे आणखी २०० ऑक्सिजन खाटा तयार केल्या. आता चऱ्हाटा आरोग्य केंद्रात १०० खाटा तयार केल्या जात आहेत. कुंभार व डीएचओ डॉ. पवार यांच्या नियोजनातून या संकल्पना यशस्वी होत आहेत.
२५ आरोग्यकेंद्रांत पाच ऑक्सिजन खाटा
कोरोनाबाधितांसह संशयितांची प्रकृती चिंताजनक झाल्यास त्याला तत्काळ जवळच्या प्राथमिक आरोग्य केंद्रात ऑक्सिजन मिळणार आहे. यासाठी २५ पीएचसीमध्ये पाच ऑक्सिजन खाटांचे नियोजन केले आहे. येथे रुग्णाला स्थिर करून नंतर पुढे पाठविले जाणार आहे. सर्व जबाबदारी ही वैद्यकीय अधिकारी आणि कर्मचाऱ्यांवर असेल.
चऱ्हाटा आरोग्य केंद्राची इमारत नवी असून येथे १०० ऑक्सिजन खाटा तयार केल्या जात आहेत. सोमवारी कामाला सुरुवात होऊन आठवडाभरात ते पूर्ण होईल. तसेच २५ पीएचसीमध्येही ५ ऑक्सिजन खाटा तयार केल्या जात आहेत. आठवडाभरात याला सुरुवात होईल. डीएचओंनी यादी केली आहे.
- अजित कुंभार, मुख्य कार्यकारी अधिकारी, बीड