बीड : डॉक्टर आणि रुग्णालयांवर होणाऱ्या अन्यायाच्या निषेधार्थ १८ जून रोजी देशव्यापी पातळीवर निषेध दिन पाळण्यात येत आहे. या देशव्यापी आंदोलनाचा एक भाग म्हणून आयएमए बीडचे सदस्य डॉक्टर काळ्या फिती लावून आपले रोजचे काम करणार आहेत. भारताचे पंतप्रधान माननीय नरेंद्र मोदी यांना मागण्यांचे पत्र जिल्हाधिकाऱ्यांमार्फत पाठवणार असल्याची माहिती आयएमए बीडचे अध्यक्ष डॉ. अनुराग पांगरीकर यांनी दिली.
महाराष्ट्रात गेल्या दीड वर्षात रुग्णालयातील शारीरिक हिंसाचाराच्या १५ घटना घडलेल्या आहेत, म्हणजे सर्वसाधारण दर महिन्याला एक तरी डॉक्टर हा कुठल्यातरी रुग्णाच्या नातेवाइकांच्या हल्ल्याचा बळी ठरतो किंवा कमीत कमी एक रुग्णालय हे हल्ल्याचा बळी ठरते आणि तिथल्या मालमत्तेचे नुकसान होते. बीड येथील बऱ्याच सामाजिक संघटनांनी डॉक्टर व रुग्णालयांवर होणाऱ्या अशा हल्ल्यांचा तीव्र निषेध केला असून आयएमएच्या मागण्या रास्त असल्याची भावना आमच्यापर्यंत पोहोचवल्याचे डॉ. पांगरीकर म्हणाले.
डॉक्टरांवरील हिंसाचार रोखण्यासाठीचा केंद्रीय कायदा पारित करावा, या कायद्याचा मसुदा संसदेमध्ये तयार आहे फक्त गृहमंत्रालयाच्या काही आक्षेपांमुळे पारित होण्यापासून थांबलेला आहे. तो त्वरित पारित करावा, सर्व वैद्यकीय आस्थापना या संरक्षित क्षेत्र घोषित करण्यात याव्यात. रुग्णालयांच्या सुरक्षेचे प्रमाणीकरण करण्यात यावे आदी मागण्यांसाठी हा निषेध दिन पाळण्यात येणार आहे. संयत आणि संसदीय सनदशीर मार्गाने आम्ही निषेध नोंदवणार आहोत. काळ्या फिती लावून, काळे मास्क लावून आम्ही काम करणार असल्याचे डॉ. पांगरीकर यांनी सांगितले.