लोकमत न्यूज नेटवर्क
केज : घरगुती गॅसचा पाईप लीक झाल्याने घराला लागलेल्या आगीत स्वयंपाक करीत असलेल्या सुनेसह सासू व सात वर्षांची मुलगी जखमी झाली आहे, तर घरातील संसारोपयोगी साहित्य भस्मसात झाले आहे. ही घटना तालुक्यातील सोनेसांगवी येथे शनिवारी सकाळी दहा वाजता घडली आहे.
केज तालुक्यातील सोनेसांगवी येथील जयश्री अशोक कणसे या शनिवारी सकाळी दहा वाजता राहत्या घरात गॅसवर स्वयंपाक करीत होत्या. यावेळी गॅस सिलिंडरकडून गॅसच्या शेगडीकडे आलेला गॅस पाईप अचानक लिक झाला. यामुळे अचानक गॅसच्या पाईपने पेट घेतला. यानंतर घरात आगीचा भडका झाला. यामुळे घरातील संसारोपयोगी साहित्यास आग लागली. काही क्षणातच आगीने रौद्ररूप धारण केले. आगीत स्वयंपाक करीत असलेल्या जयश्री अशोक कणसे (वय ३०) या कमरेपासून खाली भाजल्या आहेत, तर त्यांच्या सासू सुक्षला विष्णू कणसे (५०) यांच्या हाताला व पायाला भाजले आहे, तर सात वर्षीय श्रद्धा अशोक कणसे ही जखमी झाली आहे. त्यांना उपचारासाठी अंबाजोगाई येथील स्वामी रामानंद तीर्थ रुग्णालयात दाखल करण्यात आले असल्याची माहिती मुकुंद कणसे यांनी दिली आहे.
....
सुनेनेच सासू, मुलीस घराबाहेर काढले
घरात लागलेल्या आगीने घरात सर्वत्र धुराचा लोळ पसरला होता. याही परिस्थितीत जयश्री कणसे यांनी घराचा पाठीमागील बाजूचा दरवाजा उघडून सासू व मुलीस घेऊन घराबाहेर पडल्या. यामुळे पुढील अनर्थ टळला.
.....
तरुणांनी विझविली आग
या आगीत घरातील किराणा दुकानातील मिठाचे पोते, लाह्याचे पोते यासह विक्रीसाठी ठेवलेले शेती साहित्य, कपडे, भांडी, आदी विविध वस्तू खाक झाल्या. घटनेची माहिती मिळताच गावातील तरुणांनी घरातील गॅस सिलिंडर घराबाहेर फेकून देत त्यावर कपडा टाकून त्याची आग विझविली.
....