शेतकऱ्यांना मोफत चारा बियाणांचे वाटप

आष्टी : आष्टी तालुका दूध संघामध्ये चारा, बियाणे वाटप शुभारंभ आमदार सुरेश धस यांच्या हस्ते करण्यात आला.

आष्टी तालुका दूध संघामार्फत २५० शेतकऱ्यांना मका, कडवळ व बाजरी या चारा पिकाचे बियाणे देण्यात आले.

याप्रसंगी दूध संघाचे अध्यक्ष संजय गाढवे, उपाध्यक्ष आत्माराम फुंदे, कार्यकारी संचालक मच्छिंद्र धनवडे, मोहन झांबरे, चंद्रकांत भोसले, संस्था प्रतिनिधी व शेतकरी उपस्थित होते.

कोरोना लॉकडाऊन असल्याने दूध व्यवसाय खूप अडचणीत आला आहे. ३० रुपये प्रतिलिटर मिळणारा भाव २० रुपये झाला आहे. यामुळे दूध उत्पादक शेतकरी अडचणीत आला आहे. कोरोना काळात शेतकऱ्यांना मदत व्हावी यासाठी राष्ट्रीय डेअरी विकास बोर्ड यांच्यामार्फत आष्टी तालुका दूध उत्पादक संघास १६.५ क्विंटल मका, कडवळ, बाजरी चारा पिकाचे बियाणे उपलब्ध झालेले आहे. त्यातून हे वाटप केले आहे.