'तुझाही संतोष देशमुख करू...', वाल्मिक कराडच्या बातम्या पाहिल्यामुळे तरुणाला जबर मारहाण

वाल्मिक कराड आणि धनंजय मुंडेंच्या बातम्या पाहतो म्हणून तरुणाला लाथा-बुक्क्या, लोखंडी रॉड, कोयत्याने मारहाण

धारूर(बीड)- धारूर पोलीस स्टेशन हद्दीतील केज तालुक्यातील तरनळी येथे आज (ता.5) रोजी दुपारी वाल्मीक कराड व मुंडे साहेबांच्या बातम्या पाहिल्या तर तुझा संतोष देशमुख करू म्हणत गावातील दोन युवकांनी अशोक मोहिते नावाच्या तरुणाला लाथा-बुक्क्या, लोखंडी रॉड, कोयत्याने मारहाण करुन जखमी केले. सध्या जखमी तरुणावर रुग्णालयात उपचार घेत असून, त्याचा मावस भाऊ बालासाहेब भोसले याच्या फिर्यादीवरून धारूर पोलीस स्टेशनमध्ये 2 आरोपींविरोधात गुन्हा नोंद करण्यात आला आहे.

सविस्तर माहिती अशी की, धारूर पोलीस स्टेशन हद्दीतील व केज तालुक्यातील तरनळी गावामध्ये (ता.5) फेब्रुवारी बुधवार रोजी दुपारी अडीच वाजता गावातील रमाई चौकात अशोक शंकर मोहिते हा मोबाईलवर व्हिडिओ पाहत होता. यावेळी गावातील एका लाल रंगाच्या बाईकवरुन(MH 44 R 9294) वैजनाथ भारत बांगर आणि अभिषेक सिद्धेश्वर सानप आले व त्यांनी अशोक मोहितेला लाथा-बुक्याने, लोखंडी रॉड, कोयत्याने मारहाण केली.

यापुढे वाल्मीक कराड व धनंजय मुंडे साहेबांच्या बातम्या पाहिल्या तर तुझा संतोष देशमुख करू, म्हणत शिवीगाळ अन् जीवे मारण्याची धमकीही दिली. या घटनेनंतर जखमी अशोक मोहीतेला अंबाजोगाई येथील स्वामी रामानंद तीर्थ रुग्णालयात दाखल करण्यात आले. अशोकचा मावस भाऊ बालासाहेब भोसले याच्या फिर्यादीवरून धारूर पोलीस स्टेशनमध्ये सानप व बांगरवर गुन्हा नोंद करण्यात आला आहे. पुढील तपास पोलीस निरीक्षक देविदास वाघमोडे यांच्या मार्गदर्शनाखाली पोलीस करत आहेत.