मोर्शी : शहरातून हिवरखेड येथे गेलेल्या विद्युत वाहिनीच्या तारांचे स्पार्किंग होऊन दोन मुले गंभीररीत्या जखमी झाली. प्रभाग क्रमांक ८ मधील जुन्या पाण्याच्या टाकीजवळ ७ फेब्रुवारी रोजी दुपारी ४ च्या सुमारास ही घटना घडली. अर्पित रमेश खुरपे (९) व पार्थ टिकाराम खुरपे (८) अशी भाजलेल्या मुलांची नावे आहेत.
मोर्शी पॉवर हाऊस येथून जुनी पाण्याची टाकी मार्गे हिवरखेड येथे ३३ केव्हीची मुख्य वीज वाहिनी गेली आहे. टाकीच्या परिसरात वास्तव्यास असलेल्या खुरपे कुटुंबातील अर्पित व पार्थ हे दोघे भाऊ घराच्या स्लॅबवर खेळत होते. सोसाट्याच्या वाऱ्यामुळे तारेचे घर्षण होऊन त्याचा जबर झटका या दोन्ही मुलांना बसला. धोका ओळखून पार्थने मोठ्या भावाला खाली ढकलून दिले. विजेच्या धक्क्याने अर्पितचे डोके व चेहरा, तर पार्थचे हाताला व पायाला गंभीर दुखापत झाली. लगेच नागरिकांनी त्यांना मोर्शी उपजिल्हा रुग्णालयात उपचारार्थ दाखल केले. मात्र, उपजिल्हा रुग्णालयात कोणतीही सोय उपलब्ध नसल्याने त्यांना पुढील उपचारासाठी अमरावती येथील खासगी रुग्णालयात दाखल करण्यात आले आहे.
परिसरात वारंवार अशा घटना घडत असून, महावितरणने त्याकडे दुर्लक्ष चालविले आहे. या गंभीर समस्येची नोंद घेऊन महावितरणने या वीजतारा इतरत्र वळवाव्या, अन्यथा नागरिकांना घेऊन उपोषणास बसण्याचा इशारा या प्रभागाचे नगरसेवक तथा पालिका उपाध्यक्ष आप्पा गेडाम यांनी दिला आहे.