नियम गॅसवर!

शहर पोलीस आयुक्तालयात सुरू असलेल्या पोलीस भरतीमध्ये दररोज सहभागी होणाऱ्या हजारोे उमेदवारांसाठी परिसरात पाणी तसेच चहा-नाश्त्याचे स्टॉल लावण्यात आले आहेत.परंतु या स्टॉल्समध्ये अन्नपदार्थ

पोलीस भरती : अंमलदारांदेखत कायद्याची ऐशीतैशी
प्रसन्न दुचक्के - अमरावती
शहर पोलीस आयुक्तालयात सुरू असलेल्या पोलीस भरतीमध्ये दररोज सहभागी होणाऱ्या हजारोे उमेदवारांसाठी परिसरात पाणी तसेच चहा-नाश्त्याचे स्टॉल लावण्यात आले आहेत.परंतु या स्टॉल्समध्ये अन्नपदार्थ शिजविण्यासाठी सर्रास नियम धाब्यावर बसवून घरगुती गॅस सिलिंडरचा वापर केला जात आहे. ‘लोकमत’ने केलेल्या स्टिंग आॅपरेशनमध्ये हा प्रकार उघड आला.
शहर पोलीस भरती प्रक्रिया ६ जूनपासून सुरू झाली. भरतीसाठी येणाऱ्या उमेदवारांची गैरसोय टाळण्यासाठी स्थानिक पोलीस अधिकाऱ्यांकडूून आवश्यक त्या उपाययोजना केल्या गेल्या. याच अनुषंगाने येथे खाद्यपदार्थांचे स्टॉलही लावण्यात आले; मात्र तेथे चक्क घरगुती गॅस सिलिंडरचा वापर होतोय.
अपघात घडल्यास जबाबदार कोण ?
पोलीस मुख्यालय व विद्यापीठाच्या प्रांगणात ही भरती प्रक्रिया पार पडत आहे. त्यामुळे तेथे पाणी व चहा-नाश्त्याचे हॉटेल लावण्यात आले आहे. यातील पोलिसांचा परिसर म्हणून ओळखला जाणाऱ्या पोलीस मुख्यालयासमोरील प्रांगणात चहा-नाश्त्याचे हॉटेल लावण्यात आले आहे. संबंधित व्यक्ती हा कॅटरर्सचा व्यवसाय करतो.
पोलीस भरती प्रक्रिया पार पडेपर्यंत त्याने पोलीस अधिकाऱ्यांच्या परवानगीने मुख्यालयासमोरील फुटबॉल मैदानासमोर हॉटेल थाटले आहे. हे हॉटेल सकाळी ९ ते दुपारी १२ वाजेपर्यंत सुरू असते. या कालावधीत हॉटेलवर गरमागरम भजी व नाश्ता घेण्यासाठी शेकडो उमेदवारांसह अधिकारी, कर्मचाऱ्यांची गर्दी उसळते. परंतु पोलिसांच्या देखतच सार्वजनिक ठिकाणी या हॉटेलमध्ये घरगुती सिलिंडरचा वापर होत आहे.
खुलेआम सुरू असणाऱ्या या सिलिंडर व गॅस शेगडीकडे अनेकांचे लक्ष जाते. परंतु पोलीस कर्मचाऱ्यांचे या नियमबाह्य प्रकाराकडे दुर्लक्ष आहे.
कुठल्याही ठिकाणी व्यवसाय करायचा असेल तर कमर्शिअल सिलिंडरचाच वापर करावा, असा शासन नियम असतानाही हे हॉटेल व्यावसायिक चक्क नियम धाब्यावर बसवून समोरच व्यवसाय थाटत आहे. थेट घरगुती गॅस सिलिंडरचा वापर करीत असल्याचे वास्तव पुढे आले आहे. संबंधित हॉटेल व्यावसायिक घरगुती सिलिंडरचा वापर वरिष्ठ पोलीस अधिकाऱ्यांसमोरच खुल्या जागेत करीत असल्याने तेथील परिसरात हा चर्चेचा विषय बनला आहे. यावर प्रकरणी पोलीस आयुक्त आपली काय भूमिका बजावितात याकडे सर्वांचे लक्ष लागले आहे. (प्रतिनिधी)