अचलपूर नगर परिषदेचा बोजा, प्लॉटधारक अडचणीत
परतवाडा : अचलपूर नगर परिषदेकडे गहाण ठेवलेल्या भूखंडांची (प्लॉटची) संबंधित ले-आऊटधारकांनी परस्पर विक्री केली आहे. विकल्या गेलेल्या या गहाण ९४ प्लॉट (भूखंड) वर नोव्हेंबर २०२० मध्ये नगर परिषदेचा बोजा चढविण्यात आला आहे. प्लॉटच्या सातबारावर तशी नोंद करण्यात आली आहे. यात या प्लॉटधारकांच्या अडचणीत वाढ झाली असून, नगर परिषदेच्या बोजाबाबत ते अनभिज्ञ आहेत.
अचलपूर नगरपालिका क्षेत्रांतर्गंत खेल बारी, खेल त्र्यंबक नारायण, खेल तपमाळी, परतवाडा, खेल टेकाळ, रायपुरा, खेल देवमाळी यांसह अन्य भागात ४९ ले-आऊटधारकांनी १७१ प्लॉट अचलपूर नगर परिषदेकडे गहाण ठेवले आहेत. ले-आऊटमधील विकासकामांसह पायाभूत सुविधांची हमी हे प्लॉट गहाण ठेवून नगर परिषदेला दिली होती. पण, यातील अनेक ले-आऊटमध्ये आजही पायाभूत सुविधा ले-आऊटधारकांनी केल्या नाहीत. तेथील अत्यावश्यक पायाभूत सुविधांच्या अनुषंगाने विकासात्मक कामे त्यांनी केली नाहीत. ले-आऊटमधील मोकळ्या भूखंडाचे (ओपन स्पेस) लेआऊटधारकांनी नगर परिषदेकडे रीतसर हस्तांतरणही केले नाही.
ले-आऊटधारकांना पायाभूत सुविधा अंतर्गत विकासकामे एका वर्षात पूर्ण करणे ले-आऊटधारकांना बंधनकारक होते. मुद्रांकावर त्यासंबंधी गहाण खतही नगर परिषदेला दिले. नागरी सुविधा विकसित न करता, खुल्या भूखंडाचे हस्तांतरण न करता गहाण भूखंड ले-आऊटधारकांनी परस्पर विकल्याचे नगरपालिकेच्या निदर्शनास आल्याने २०१९ मध्ये मुख्याधिकाऱ्यांनी संबंधितांना नोटीस दिल्या आहेत.
—————————-