नरेंद्र जावरे
फोटो - २७एएमपीएच२१
कॅप्शन - दीपाली चव्हाण यांच्या शासकीय निवासस्थानाची पाहणी करताना प्रज्ञा सरवदे, राजेश तेंडुलकर आदी
हरिसाल (अमरावती) : दीपाली चव्हाण आत्महत्या प्रकरणात निलंबित एपीसीसीएफ श्रीनिवास रेड्डी यांच्यावर गंभीर आरोप असल्याने त्यांच्या चौकशीसाठी आलेल्या अपर पोलीस महासंचालक प्रज्ञा सरवदे यांनी मंगळवारी धारणी तालुक्यातील हरिसाल येथे तब्बल पाच तास वन अधिकारी-कर्मचारी यांच्याशी प्रत्यक्ष बातचीत केली. यादरम्यान ज्यांचे बयान आहे, तो आणि आयपीएस अधिकारी प्रज्ञा सरवदे यांच्याशिवाय कुणालाच आत प्रवेश नव्हता.
अपर पोलीस महासंचालक प्रज्ञा सरवदे मुंबईहून सोमवारी अमरावती येथे आल्यावर मंगळवारी त्यांनी सकाळी ११.३० वाजता हरिसाल येथे दीपाली चव्हाण यांच्या शासकीय निवासस्थानी भेट दिली. त्यानंतर दुपारी १२ पासून थेट ५ पर्यंत अधिकारी कर्मचाऱ्यांसोबत बंदद्वार चर्चा करून प्रत्यक्ष त्यांचे म्हणणे ऐकून घेतले. दिलेले बयान योग्य आहे किंवा नाही, याची चाचपणी केली.
बॉक्स
वन बाय वन एन्ट्री
हरिसाल येथील निसर्ग निर्वचन संकुलात मंगळवारी अप्पर पोलीस महासंचालक प्रज्ञा सरवदे यांनी मुंबई वरून आलेल्या अधिकाऱ्यांनाही सोबत न घेता स्वतः वन अधिकारी-कर्मचाऱ्यांशी एकांतात चर्चा केली. एपीसीसीएफवरील आरोपांची चौकशी असल्याने त्यासंदर्भात त्यांनी दिलेल्या बयानासंदर्भात खातरजमा केली. व्याघ्र प्रकल्पाचे अधिकारी कर्मचारी किंवा इतर कुणालाच या दरम्यान एन्ट्री मिळाली नाही.
बॉक्स
कारवाईच्या शोकॉज जायच्या रेड्डींकडे
गुगामल वन्यजीव विभागाचा निलंबित आरोपी उपवनसंरक्षक विनोद शिवकुमार अधिकाऱ्यांना कुठल्याही बाबतीत त्रास द्यायचा. कारवाईसंदर्भात दिलेल्या कारणे दाखवा नोटीस एपीसीसीएफ श्रीनिवास रेड्डी यांच्या कार्यालयाकडे पाठवायचा व तेथून अधिकाऱ्यांवर कारवाई व्हायची. इतर कागदपत्रे उपवनसंरक्षक कार्यालयातच पडून राहत असल्याचा एक खुलासा या चौकशीदरम्यान झाल्याची माहिती सूत्रांनी दिली.
बॉक्स
१५ कर्मचारी, सहा अधिकाऱ्यांचे बयान नोंदविले
मंगळवारी गुगामल वन्यजीव विभागाचे सहायक वनसंरक्षक राजकुमार पटवारी, चिखलदरा आरएफओ मयूर भैलुमे, ढाकना आरएफओ हिरालाल चौधरी, तारुबांदाचे आरएफओ सुहास मोरे, फिरते पथक तथा हरिसालचे प्रभारी आरएफओ पी.एम. ठाकरे या अधिकाऱ्यांसह १५ पेक्षा अधिक महिला व पुरुष कर्मचाऱ्यांचे पूर्वी नोंदविलेल्या बयानाची सरवदे यांनी पडताळणी केली.