नगराध्यक्षपदासाठी उमेदवारांची गर्दी

जिल्ह्यातील नऊ नगरपरिषदांच्या आरक्षण सोडतीनंतर खुल्या व नामाप्र वर्गाच्या नगराध्यक्षपदासाठी इच्छुकांची गर्दी होत आहे.

निवडणूक : इच्छुकांच्या हालचालींना वेग अमरावती : जिल्ह्यातील नऊ नगरपरिषदांच्या आरक्षण सोडतीनंतर खुल्या व नामाप्र वर्गाच्या नगराध्यक्षपदासाठी इच्छुकांची गर्दी होत आहे. विशेष म्हणजे यावेळी नगराध्यक्षपदासाठी थेट निवडणूक होणार आहे. त्यामुळे या पदासाठी दावेदारांची संख्याही अधिक आहे.त्यामुळे विविध राजकीय पक्षातील पुढाऱ्यांनी उमेदवारी निश्चित करण्यासाठी हालचालींची गती वाढविली आहे. नगराध्यक्ष पदाच्या आरक्षणानुसार अचलपूर नामाप्र (स्त्री), अंजनगाव सुर्जी सर्वसाधारण, दर्यापूर सर्वसाधारण, वरूड व मोर्शी आणि चिखलदरा या तीन नगरपरिषदांचे नगराध्यक्ष पद हे सर्वसाधारण (स्त्री) प्रवर्गाकरिता आरक्षित आहे. चांदूररेल्वे व चांदूर बाजार (नामाप्र) येथील आरक्षण लक्षात घेता याठिकाणी इच्छुकांची गर्दी होणार आहे. यामध्ये केवळ शेंदुरजनाघाट नगरपरिषदेचे नगराध्यक्षपद अनुसूचित जातींकरिता राखिव आहे. त्यामुळे येथील अपवाद वगळता जिल्ह्यातील उर्वरित नगपरिषदेत आरक्षणामुळे उमेदवारांची संख्या वाढण्याची शक्यता आहे.सर्वसाधारण व नामाप्रच्या वाट्याला एखादे महत्त्वाचे पद आरक्षणाच्या सोडतीत गेले तर आपुसकच सगळयांसाठी ती एक पर्वणी ठरते.राजकीय पक्षांची कसरतअमरावती : ही पर्वणी साधण्याचा प्रयत्न सर्वांकडून होत असल्यामुळे स्पर्धा वाढत आहे. युती किंवा आघाडी होण्याची शक्यता नाही. त्यामुळे भाजप, शिवसेना, काँग्रेस, राष्ट्रवादी काँग्रेसया प्रमुख पक्षांसह अन्य स्थानिक पक्ष व अपक्ष उमेदवारांची गर्दी असे थेट नगराध्यक्षपदाच्या निवडणुकीचे चित्र राहू शकते. सर्वसाधारण व नामाप्र यावर्गातील पुरूष आणि महिलांसाठी काही नगपरिषदांचे नगराध्यक्षपद आरक्षित असल्याने अस्तित्व सिद्ध करणारे निर्णयक्षम व सक्षम सुशिक्षित उमेदवार या पदावर दावा करण्यासाठी सिद्ध होतील, असे चित्र दिसून येत आहे. अनुसूचित जाती महिलांकरिता शेंदूरजनाघाट नगरपरिषदेचे नगराध्यक्षपद आरक्षित असल्याने येथेही इच्छुकांची संख्या मोठी आहे. तरीही येथे नगराध्यक्षपदाच्या उमेदवारीसाठी फारशी गर्दी होणार नाही. परंतु उर्वरित ठिकाणी मात्र उमेदवारांची गर्दी होण्याची शक्यता आहे. नगरपरिषदेच्या सार्वत्रिक निवडणुकीत नगराध्यक्षपदासाठी थेट मतदारांमधून निवडणूक होत आहे. अशातच जिल्ह्यातील ९ नगरपरिषदांपैकी एका नगपरिषदेचा अपवाद वगळला तर नगराध्यक्षपद हे सर्वसाधारण व नामाप्रसाठी आरक्षित असल्याने याठिकाणी नगराध्यक्षपदासाठी उमेदवारी मागणाऱ्यांची संख्या अधिक आहे. त्यामुळे राजकीय पक्षाना नगराध्यक्षपदासाठी उमेदवारी देताना मोठी कसरत करावी लागणार आहे.