अमरावती : राज्याच्या उच्च व तंत्र शिक्षण विभागाने १५ फेब्रुवारीपासून महाविद्यालये सुरू करण्याचा निर्णय घेतला. तत्पूर्वी महाविद्यालये, वसतिगृहांचे इलेक्ट्रिक आणि सुरक्षा ऑडिट करण्याच्या सूचना शासनाने दिल्या आहेत. गत १० महिन्यांपासून महाविद्यालये, वसतिगृहे बंद होती, त्याचा वापर न झाल्याने सुरक्षेच्या दृष्टिकोनातून हे पाऊल उचलले जात आहे.
भंडारा येथील जिल्हा सामान्य रुग्णालयात १० नवजात बालकांचा होरपळून मृत्यू झाला होता. या घटनेनंतर वीज ऑडिटवर भर दिला जात आहे. दरम्यान १ फेब्रुवारी रोजी उच्च व तंत्र शिक्षण मंत्री उद्य सामंत यांनी ऑनलाईन बैठक घेत विद्यापीठाच्या कुलगुरुंशी संवाद साधला. या बैठकीत विद्यापीठ, महाविद्यालये सुरू करण्याबाबत चर्चा झाली, त्याअनुषंगाने १५ फेब्रुवारीपासून अकृषि विद्यापीठ संलग्न महाविद्यालये सुरू करण्यात येणार आहे. मात्र, महाविद्यालये, वसतिगृहे सुरू करण्यापूर्वी इलेक्ट्रिक, सुरक्षा ‘ऑडिट’ करावे लागणार आहे. याबाबतचा अहवाल संबंधित विभागप्रमुखांना सादर करावा लागणार आहे. महाविद्यालये, वसतिगृहे सुरू झाल्यानंतर बाहेरगावाहून येणाऱ्या विद्यार्थ्यांची संख्या मोठ्या प्रमाणात आहे. त्यामुळे सुरक्षा ऑडिटशिवाय ते सुरु करता येणार नाही, असे स्पष्ट निर्देश देण्यात आले आहे. महाविद्यालये टप्प्या टप्प्याने सुरु करण्यासाठी विद्यापीठांना एसओपी तयार करावी लागणार आहे.
---------
कोट
परीक्षेसाठी ७५ टक्के उपस्थिती अनिवार्य असते. मात्र, विद्यापीठ, महाविद्यालयात उपस्थितीसाठी विद्यार्थ्यांना सक्ती केली जाणार नाही. मात्र, ईलेक्ट्रिक, सुरक्षा ‘ऑडिट’शिवाय महाविद्यालये, वसतिगृहे सुरू करता येणार नाही.
- केशव तुपे, सहसंचालक, उच्च व शिक्षण अमरावती.
-------------------
अशी आहे जिल्ह्यात कॉलेज, वसतिगृहांची संख्या
महाविद्यालये- ११८
वसतिगृहे (समाजकल्याण) - २३
वसतिगृहे (आदिवासी) - १८