अमरावती : सध्या ज्येष्ठांसह सहव्याधी असणाऱ्या ४५ वर्षांवरील नागरिकांचेही लसीकरण सुरू आहे. या व्यक्तींनी डॉक्टरचे प्रमाणपत्र सादर करणे आवश्यक असल्याचे पालिकेच्या आरोग्य यंत्रणेकडून स्पष्ट करण्यात आले आहे. तीन दिवसांत ५८० नागरिकांना लसीकरण करण्यात आले. दरम्यान तिसऱ्या दिवशीही को-विन ॲपचा खोडा कायम होता.
प्रधानमंत्री जनआरोग्य योजनेत नोंदणीकृत रुग्णालये, केंद्र सरकारच्या आरोग्य योजनेत नोंदणीकृत रुग्णालये तसेच राज्य शासनाच्या आरोग्य विमा योजनेत नोंदणीकृत रुग्णालये अशा योजनांमध्ये नोंदणीकृत असलेल्या ८ खासगी रुग्णालयात शासकीय निकषानुसार जागा, लस साठवणुकीची सोय, आवश्यक परिचारिका व इतर मनुष्यबळ असल्यास याठिकाणी कोरोना लसीकरण सेंटर निश्चित करण्यात येऊन टप्प्याटप्प्याने सुरू करण्यात येणार आहे. दरम्यान, महापौर चेतन गावंडे यांनी बुधवारी पीडीएमसी व डेंटल कॉलेजमधील लसीकरण केंद्राला भेट देऊन पाहणी केली. ‘पीडीएमसी’चे अधिष्ठाता ए. टी. देशमुख, डेंटल कॉलेजचे अधिष्ठाता राजेश गोंधळेकर, आरोग्य अधिकारी विशाल काळे आदी उपस्थित होते.
ज्येष्ठांच्या लसीकरणास सुरुवात करण्यात आली असून त्यात ६० वर्षापेक्षा अधिक वयोगटातील नागरिक, तसेच सहव्याधी (को-मॉर्बेडिटी) असणारे ४५ ते ५९ वयाचे नागरिकांचे लसीकरण होत आहे.
बॉक्स
को-मॉबेडिबी रुग्णांना प्रमाणपत्र अनिवार्य
को-मॉर्बेडिटीमध्ये पल्मनरी आर्टरी हायपरटेन्शन आणि हायपरटेन्शन, डायबेटीस ऑन ट्रीटमेंट, अंजायना आणि हायपरटेन्शन, डायबेटीस ऑन ट्रीटमेंट व इतर आजारांचा समावेश आहे. केंद्र सरकारमार्फत वैद्यकीय सेवा देणाऱ्या नोंदणीकृत व्यावसायिक यांच्याकडून घ्यावयाच्या प्रमाणपत्राचा नमुना निश्चित करण्यात आलेल्या नमुन्यामध्ये प्रमाणपत्र अपलोड करणे बंधनकारक आहे.
बॉक्स
लसीकरण लाभार्थ्यांची नोंदणी करताना ओपन स्लॉटमध्ये लाभार्थी स्वत:चा मोबाईल नंबर ‘कोविन.जीओव्ही.इन’ या वेबसाईटवर भरून येणाऱ्या ओटीपीनुसार नोंदणी करून लसीकरणाची वेळ व दिनांक स्वत: निश्चित करू शकता. याशिवाय रिझर्व्ह स्लॉटमध्ये स्वत:हून नोंदणी करणे शक्य नाही, असे लाभार्थी महानगरपालिकेने स्थापित केलेल्या बुथवर आपली नोंदणी करून लस घेऊ शकतात.
बॉक्स
ही कागदपत्रे अनिवार्य
लसीकरणासाठी ६० वर्षांवरील नागरिकांनी आधारकार्ड, पॅनकार्ड, कार्यालयीन, निवडणूक ओळखपत्र इत्यादी वयाबाबतच्या योग्य पुराव्याची कागदपत्रे सादर करणे आवश्यक आहे. त्याचप्रमाणे सहव्याधी असणाऱ्या नागरिकांनी वयाच्या पुराव्यासोबतच वैद्यकीय सेवा देणा-या नोंदणीकृत व्यावसायिकाकडून विहीत नमुन्यात प्रमाणित केलेले प्रमाणपत्र लसीकरण केंद्र ठिकाणी दाखविणे आवश्यक आहे.
बॉक्स
शासकीयमध्ये मोफत, खासगीत २५० रुपये डोज
महानगरपालिकेच्या रुग्णालयात प्रत्येक डोस मोफत देण्यात येईल. केंद्र व राज्य शासनाच्या मार्गदर्शक सूचनांनुसार प्रधानमंत्री जनआरोग्य योजनेमध्ये नोंदणीकृत रुग्णालये, सीव्हीसी नोंदणीकृत रुग्णालयात लस घेण्यासाठी प्रति लाभार्थी रुपये २५० रुपये प्रति डोज शुल्क आकारण्यात येईल. लाभार्थ्याने पहिला डोस घेतल्यानंतर २८ ते ४२ दिवस अंतरात दुसरा डोज घेणे बंधनकारक आहे.