एसएसआर ऑनलाईन पाठविला, ७० टक्के कागदपत्रे रवाना, ३० टक्के कामे चमू तपासणार
अमरावती : कोरोनाच्या उद्रेकाचा शैक्षणिक क्षेत्राला सर्वाधिक फटका बसला. अनेक विद्यापीठांचे ‘नॅक’मू्ल्यांकन रखडले आहे. मात्र, संत गाडगेबाबा अमरावती विद्यापीठाचे राष्ट्रीय मूल्यांकन व अधिस्वीकृती परिषद (नॅक) चमूकडून जुलैअखेर होण्याचे संकेत आहेत. सेल्फ स्टडी रिपोर्ट (एसएसआर) देखील ऑनलाईन पाठविण्यात आला आहे.
दर पाच वर्षांनी विद्यापीठांना ‘नॅक’ मूल्यांकन बंधनकारक आहे. विद्यापीठ अनुदान आयोगाच्या चमूकडून ते केले जाते. तत्पूर्वी शैक्षणिक संस्थांना दिल्ली येथे विद्यापीठ अनुदान आयोगाकडे ऑनलाईन एसएसआर पाठवावा लागतो. मात्र, मार्च २०२० पासून कोरोना विषाणूचा प्रादुर्भाव सुरू झाला आणि आजतागायत तो कायम आहे. त्यामुळे संत गाडगेबाबा अमरावती विद्यापीठाचे डिसेंबर २०२० मध्ये होणारे ‘नॅक’ मूल्यांकन होऊ शकले नाही. परंतु, तत्कालीन कुलगुरू मुरलीधर चांदेकर यांच्या पुढाकाराने ‘नॅक’ मूल्यांकनासाठी समिती गठित करण्यात आली होती. या समितीच्या माध्यमातून विभागप्रमुख, प्राध्यापक, कर्मचाऱ्यांकडून ‘नॅक’ची तयारी पूर्ण करण्यात आली. खरे तर संत गाडगेबाबा अमरावती विद्यापीठाचे ‘नॅक’ मूल्यांकन सहा महिन्यांपूर्वीच होणे अपेक्षित होते. मात्र, २० जुलैनंतर ‘नॅक’ची चमू येईल, असे संकेत आहेत.
------------------------
‘नॅक’ची चमू पाहणी करणार
संत गाडगेबाबा अमरावती विद्यापीठाने ‘नॅक’संदर्भात कागदोपत्री अहवाल यूजीसीकडे पाठविला आहे. आता केवळ ३० टक्के तपासणीची कामे शिल्लक आहेत. यात प्रत्येक विभागाचे सादरीकरण, विद्यापीठात पायाभूत सुविधा, सामाजिक उत्तरदायित्व, चमूकडून विद्यार्थ्यांशी संवाद, माजी विद्यार्थ्यांची कर्तव्यपूर्ती आदी बाबी ‘नॅक’ची चमू पाहणी करणार आहे. या चमूत पाच ते सहा सदस्य असतील, अशी माहिती आहे.
-------------
विद्यापीठाने ‘नॅक’ मू्ल्यांकनाची तयारी पूर्ण केली आहे. विद्यापीठ अनुदान आयोगाकडे ऑनलाईन एसएसआर पाठविला आहे. आता केवळ ‘नॅक’ चमू येण्याची प्रतीक्षा आहे. जुलैअखेर ‘नॅक’ मूल्यांकन होईल.
- अविनाश मोहरील, अधिष्ठाता, संत गाडगेबाबा अमरावती विद्यापीठ.