वाघोडा ते फुबगाव फाटा रस्ता दुरुस्तीसाठी आंदोलन

फोटो -

नांदगाव खंडेश्वर : वाघोडा ते फुबगाव फाटा रस्त्याच्या परिपूर्ण दुरुस्तीच्या मागणीकरिता वाघोडा येथील नागरिकांनी बांधकाम कंत्राटदार कंपनीची वाहने वाघोडा येथे सोमवारी रोखली.

तीन वर्षांपासून समृद्धी महामार्गाचे काम सुरू आहे. अवजड वाहनांमुळे वाघोडा ते फुबगाव फाटा हा रस्ता पूर्ण नादुरुस्त झाला आहे. रस्त्यात जागोजागी खड्डे पडले आहेत. वाघोडा, शेलू नटवा, फुबगाव, सुलतानपूर, धानोरा शिक्रा, बेलोरा आदी गावातील नागरिकांना तालुक्याच्या ठिकाणी जाण्याकरता हा रस्ता महत्त्वाचा आहे. अवजड वाहतुकीकरिता प्रतिबंधित असलेल्या या मार्गावर रस्ता दुरुस्त करून देण्याच्या अटीवर शासनाने अवजड वाहतुकीस परवानगी दिली होती, असे आंदोलकांचे म्हणणे होते. समृद्धी महामार्गाचे काम या भागात पूर्णत्वास आले असताना रस्त्याच्या दुरुस्तीकरिता चालढकल होत आहे. वाघोडा व परिसरातील नागरिकांनी अनेक वेळा निवेदने देऊनसुद्धा अद्याप दुरुस्तीच्या कामाला सुरुवात झाली नाही. विशेष प्रकल्प विभाग, सार्वजनिक बांधकाम विभाग (बडनेरा) यांनी अनेक वेळा महाराष्ट्र राज्य रस्ते विकास महामंडळाला संबंधित कंपनीकडून या रस्त्याची दुरुस्ती करून घेण्याबाबत पत्रव्यवहार केला. परंतु अद्यापही या रस्त्याची दुरुस्ती होत नसल्यामुळे ३० ऑगस्ट रोजी वाघोडा येथील नागरिकांनी संबंधित कंपनीची वाहने अडवून रोष व्यक्त केला. यावेळी एम.एस.आर.डी.सी.चे उपअभियंता ए.एन. ढेरे व एनसीसी प्रतिनिधी बी.के. सिंह यांनी नांदगाव खंडेश्वरचे ठाणेदार हेमंत ठाकरे यांच्या उपस्थितीत गावकऱ्यांना रस्ता दुरुस्तीसंबंधी उच्चस्तरीय बैठकीचे लेखी आश्वासन दिल्यानंतर गावकऱ्यांनी आंदोलन तात्पुरते मागे घेतले असल्याचे आंदोलकांनी सांगितले. यावेळी काँग्रेसचे विनोद जगताप, भारतीय कम्युनिस्ट पक्षाचे जिल्हा सचिव सुनील मेटकर, वाघोडा येथील उपसरपंच ओमप्रकाश सावळे, अजय भोयर, बबलू गावनर, तुकाराम भलावी, बाळू सुलताने, ज्ञानेश्वर भगवे, सोमदास मेहेंगे, रवि मेटकर, अजय भगत व गावकरी उपस्थित होते.

310821\1413-img-20210831-wa0001.jpg

वाघोडा ते फुबगाव फाटा रस्ता दुरुस्ती साठी आंदोलन.