पुन्हा 'आॅपरेशन मुस्कान'

हरवलेल्या मुलांचा शोध घेण्याकरिता शहरात पुन्हा आॅपरेशन मुस्कान ही मोहिम सुरु करण्यात येणार आहे.

महासंचालकांचे आदेश : हरवलेल्या मुलांचा शोध अमरावती : हरवलेल्या मुलांचा शोध घेण्याकरिता शहरात पुन्हा आॅपरेशन मुस्कान ही मोहिम सुरु करण्यात येणार आहे. पोलीस महासंचालकांनी राज्यभरातील पोलिसांना तसे आदेश दिले असून अमरावतीत १ एप्रिलपासून ही मोहिम सुरु केली जाणार आहे. शहर आयुक्तालय हद्दीत १ ते ३१ जानेवारी २०१५ दरम्यान १८ वर्षांच्या आतिल हरविलेल्या १५ मुलां-मुलींचा शोध घेण्यात आला, त्यामध्ये एका मुलाचा शोध घेऊन त्याला आई-वडिलांच्या स्वाधिन करण्यात आले होते. तसेच शहरात हरविलेला एक मुलगा व तिन मुलींना आई-वडिलांच्या स्वाधिन करण्यात आले. १ ते ३१ जुलै २०१५ मध्ये ही मोहिम राबविण्यात आली. त्यामध्ये १६ मुलां-मुलींपैकी दोन मुले पोलिसांना सापडली होती. त्यांना आई-वडिलांच्या स्वाधिन करण्यात आले. तसेच अन्य ठिकाणी आढळून आलेल्या चार मुलांना बाल निरीक्षण गृहात ठेवण्यात आले होते. आता पुन्हा १ एप्रिल ते ३० एप्रिलपर्यंत आॅपरेशन मुस्कान ही मोहिम राबविली जाणार असून १८ वर्षाच्या आतिल मुलां-मुलीचा शोध घेण्यात येणार आहे. यासंदर्भात पोलीस आयुक्त लवकरच बैठक घेऊन पोलीस अधिकाऱ्यांना सुचना देणार असल्याची माहिती पोलीस सुत्रांनी दिली.