पोलीस अधीक्षकांच्या विशेष पथकाची कारवाई
अकोला : डाबकी रोड पोलीस ठाण्याच्या हद्दीतील गुलजारपुऱ्यात असलेल्या गौसिया चौक येथील एका घरात शस्त्रांचा साठा असल्याच्या माहितीवरून पोलीस अधीक्षक जी श्रीधर यांच्या विशेष पथकाने छापा टाकून त्याच्या घरातून शस्त्रांचा साठा जप्त केला. या आरोपींविरुद्ध डाबकी रोड पोलीस ठाण्यात गुन्हा दाखल करण्यात आला आहे.
गुलजारपुरा येथील रहिवासी जमील खान राउफ खान (वय २५ वर्ष) याच्या घरात शस्त्रांचा साठा असल्याची माहिती पोलीस अधीक्षक जी श्रीधर यांच्या विशेष पथकाने पथकाचे प्रमुख विलास पाटील यांना मिळाली. या माहितीवरून त्यांनी छापा टाकला. त्यानंतर आरोपीच्या घरातून दोन मोठ्या तलवारी, एक मोठा चाकू, एक कु-हाड व एक जुनी एअर पिस्तूल असा विविध शस्त्रांचा साठा जप्त करण्यात आला आहे. या प्रकरणी आरोपीविरुद्ध आर्म ॲक्टच्या कलम ४/२५ व मुंबई पोलीस कायद्याच्या कलम १३५ अन्वये गुन्हा दाखल करण्यात आला आहे. ही कारवाई पोलीस अधीक्षक जी श्रीधर, अतिरिक्त पोलीस अधीक्षक मोनिका राऊत, शहर पोलीस उपअधीक्षक सचिन कदम यांच्या मार्गदर्शनाखाली विशेष पथकाचे प्रमुख विलास पाटील व त्यांच्या पथकाने केली.