मॉडेल रेल्वे स्थानकावर पाणीच पाणी

पावसाने केली पोलखोल; अकोला रेल्वे स्थानकावर प्रवाशांची तारांबळ.

अकोला : मॉडेल रेल्वे स्थानक म्हणून ओळख असलेल्या अकोला रेल्वे स्थानकाच्या फलाट क्रमांक १ आणि २ वरील छताची अनेक ठिकाणी तुटफूट झाली आहे. सोमवारी दुपारी झालेल्या पावसाचे पाणी थेट या फलाटांवर बरसल्याने दोन्ही फलाटांवर गाडीची वाट पाहत उभ्या असलेल्या प्रवाशांची तारांबळ उडाली. पावसाळय़ासाठी विशेष नियोजन करणार्‍या रेल्वे प्रशासनाची यामुळे पोलखोल झाली आहे. मध्य रेल्वेमार्गावरील ह्यअह्ण श्रेणीच्या दर्जा असलेल्या रेल्वे स्थानकांमध्ये अकोला रेल्वे स्थानकाची गणना होते. मॉडेल रेल्वे स्थानक म्हणून ओळख असलेल्या या रेल्वे स्थानकाची वर्षभरात कोटींच्या घरात आवक असली तरी या ठिकाणी सुविधांचा मात्र कायम अभावच दिसून येतो. एक आणि दोन नंबरच्या फलाटांवरील शेडची तुटफूट झाली असल्याने बर्‍याच ठिकाणी छताला मोठमोठी छिद्रे पडली आहेत. परिणामी पावसाचे पाणी थेट फलाटांवर पडत असल्याने प्रवाशांना नाहक त्रास सहन करावा लागत आहे. सोमवारी दुपारी झालेल्या पावसाने स्थानिक प्रशासनाची पोलखोल केली. पावसाचे पाणी थेट फलाटावर बरसल्याने एक नंबर फलाटावर गाड्यांची वाट पाहत उभ्या असलेल्या प्रवाशांची एकच तारांबळ उडाली. पाण्यामुळे फलाटावर घसरण निर्माण झाल्याने गाडी येताच जागा धरण्यासाठी डब्याच्या दिशेने धाव घेणार्‍या अनेक प्रवाशांनी फलाटावर लोटांगण घातले. इतर प्रवाशांनादेखील फलटांवर हातातील सामान घेऊन चालणे कठीण झाले होते. रेल्वे स्थानक प्रबंधकांच्या कार्यालयासमोरच व बुक स्टॉलसमोर बरसणार्‍या पावसामुळे धारा लागल्या होत्या. याव्यतिरिक्त फूड प्लाजा, उपअधीक्षकांच्या कार्यालयासमोर पाऊस थांबल्यानंतरही पाणी वाहत होते. यामुळे प्रवाशांना नाहक त्रास सहन करावा लागला. दरवर्षी पावसाळय़ाच्या सुरुवातीला रेल्वे प्रशासनाच्यावतीने रेल्वे स्थानकाच्या डागडुजीसाठी विशेष खर्च केला जातो; मात्र सोमवारी बरसलेल्या पावसाने रेल्वे प्रशासनाची पोलखोल केली आहे.