युवकाच्या हत्याप्रकरणातील तीन आरोपींना मंगळवारपर्यंत कोठडी

नायगावातील युवकाची निर्घृण हत्या; तीन आरोपींना २७ मे पर्यंत पोलिस कोठडीत

अकोला : नायगावातील २८ वर्षीय युवकाची किरकोळ कारणांवरून निर्घृण हत्या केल्याप्रकरणी आकोट फैल पोलिसांनी १७ मे रोजी रात्री अटक केलेल्या तीन आरोपींना शुक्रवारी न्यायालयात हजर करण्यात आले. न्यायालयाने तिघाही आरोपींना २७ मे पर्यंत पोलिस कोठडीत ठेवण्याचे आदेश दिले. यापूर्वी तीनही आरोपी १७ ते २३ मेदरम्यान पोलिस कोठडीत होते. पोलिसांनी दिलेल्या माहितीनुसार, नायगावात राहणारा अहमद बन्सी दर्गेवाले (२८) याची शनिवारी रात्री ८.३0 वाजताच्या सुमारास नायगावातच राहणारे इमरान रजा खान, वहीद बेग, अजिमोद्दीन बद्रुद्दीन यांच्यासह आणखी दोन युवकांनी तलवार, चाकू व बीअरच्या बाटलीच्या काचेने वार करून हत्या केली होते. या प्रकरणी आकोट फैल पोलिसांनी इमरान रजा खान, वहीद बेग, अजिमोद्दीन बद्रुद्दीन या तिघांना ताब्यात घेतले होते. दोन युवक अद्यापही फरार आहेत. आरोपी इमरान खान, वहीद बेग, अजिमोद्दीन बद्रुद्दीन यांना शुक्रवारी दुपारी न्यायालयात हजर करण्यात आले. न्यायालयाने तिघाही आरोपींना २७ मे पर्यंत पोलिस कोठडीत ठेवण्याचे आदेश दिले.