चिखली : शहरातील विकासकामे करणे, परिसरामध्ये असलेल्या महापुरुषांच्या विचारांचे आजच्या पिढीला आदर्श मिळावेत, यासाठी पुतळ्यांचे आणि उद्यानांचे सौंदर्यीकरण हा भौतिक विकास करणे, ही नगरपालिका, लोकप्रतिनिधी यांचे नियमित कर्तव्याचा एक भाग आहे. या कामाबद्दल नगरपालिका प्रशासन आणि लोकप्रतिनिधींचे कौतुक होणे क्रमप्राप्तच आहे; मात्र आमदार राहुल बोंद्रे यांच्या संकल्पनेतून राबविण्यात आलेल्या भगीरथ जलसंजीवनी प्रकल्प आणि ई-प्रशाला हे उपक्रम राज्यातीलच नव्हे तर देशभरातील लोकप्रतिनिधींनी या कामाचा आदर्श घ्यावा, असे पथदश्री प्रकल्प आहेत, असे गौरवोद्गार छत्रपती संभाजीराजे भोसले यांनी काढले. चिखली नगर परिषदेच्यावतीने छत्रपती शिवाजी महाराज आणि हिंदुसूर्य महाराणा प्रताप यांच्या पुतळा परिसराचे तसेच छत्रपती शिवाजी महाराज उद्यानाच्या सौंदर्यीकरणाच्या पूर्ण करण्यात आलेल्या कामाचे लोकार्पण सोमवार, १८ ऑगस्ट रोजी छत्रपती संभाजीराजे भोसले (कोल्हापूर) यांच्या हस्ते पार पडले. या कार्यक्रमाच्या अध्यक्षस्थानी आमदार राहुल बोंद्रे हे होते तर रिसोडचे आमदार अमित झनक, माजी आमदार बाबूराव पाटील, नगराध्यक्ष शोभाताई नंदकिशोर सवडतकर, जिल्हा काँग्रेसचे अध्यक्ष विजय अंभोरे, उपाध्यक्ष हाजी दादुसेठ, सरचिटणिस माणिकराव जाधव, सरचिटणिस तथा नगरसेवक दीपक देशमाने, तालुका काँग्रेसचे अध्यक्ष डॉ.सत्येंद्र भुसारी, जि.प.सदस्य अशोकराव पडघान, अंकुशराव वाघ, प्रा.यशवंत गोसावी, बुलडाणा पं.स.सभापती निसार चौधरी, नंदकिशोर सवडतकर, कैलास खंदारे, राकाँ तालुकाध्यक्ष भगवानराव काळे, शहराध्यक्ष रवि तोडकर, समाधान सुपेकर, प्रदीप पचेरवाल, सिद्धेश्वर इंगळे, राम डहाके, उत्तमराव साळोक, भगवानराव भोंडे, दिनदयाल वाधवाणी, कुणाल बोंद्रे, सुनील सुरडकर, दीपक लहाने, राम जाधव, किशोर साखरे, साहेबराव पाटील यांची प्रमुख उपस्थिती होती. यावेळी छत्रपती संभाजीराजे भोसले यांनी छत्रपती शिवाजी महाराजांनी आणि राजर्षी शाहू महाराजांनी रयतेच्या, प्रामुख्याने शेतकर्यांच्या पाण्याची गरज पूर्ण करण्यासाठी प्राधान्य दिले होते. राजर्षी शाहू महाराजांच्या काळातील बंधारे हे कोल्हापूर बंधारे या नावाने आज देशभर ओळखले जातात, त्याचप्रमाणे या मतदारसंघामध्ये झालेले भगीरथ जलसंजीवनी प्रकल्पांतर्गतचे नदी खोलीकरण आणि रुंदीकरणाचे काम देशभर पथदश्री ठरेल, असे मत केले. चिखलीच्या ग्रामीण भागातील जिल्हा परिषद आणि नगर पालिकेच्या शाळांमध्ये शिकणार्या गोरगरीब कष्टकर्यांच्या मुलांसाठी सुरु केलेला ई-प्रशाला हा उपक्रम सर्वांनी अनुकरण करावा, असाच आहे. छत्रपती शिवराय आणि राजर्षी शाहू महाराजांचा न्यायाचा, रयतेच्या विकासाचा, समतेचा विचार जो-जो पुढे नेईल त्याच्या पाठीशी छत्रपती संभाजीराजे उभा राहील, अशी ग्वाही महाराजांनी यावेळी बोलताना दिली. शिवशाहू यात्रेदरम्यान या परिसरामध्ये आलो असताना छत्रपती शिवाजी महाराज आणि हिंदुसूर्य महाराणा प्रताप यांच्या पुतळ्याचे सौंदर्यीकरण करावे, अशी सूचना आपण आमदार राहुल बोंद्रे यांना केली होती, ती त्यांनी पूर्ण केली. ही यात्रा मराठा आरक्षणासाठी असल्याची राळ उठविण्यात आली होती; मात्र छत्रपती शिवाजी महाराज आणि राजर्षी शाहू महाराज यांनी १८ पगड जातींच्या विकासाचा विचार आणि वारसा दिलेला असल्यामुळे या संपूर्ण १८ पगड जातींच्या न्याय्य मागण्यांसाठी छत्रपती संभाजीराजे आघाडीवर असेल, अशी ग्वाही त्यांनी यावेळी दिली. या प्रसंगी आमदार अमित झनक, माजी आमदार बाबूराव पाटील, प्रा.यशवंत गोसावी, विजय अंभोरे यांनीही यावेळी मनोगत व्यक्त केले. यावेळी आमदार राहुल बोंद्रे यांच्या कार्याची दखल घेणार्या पुस्तिकेचे प्रकाशन मान्यवरांच्या हस्ते करण्यात आले. प्रास्ताविक डॉ.सत्येंद्र भुसारी. संचालन प्रसिद्ध कवी अजीम नवाज राही यांनी तर आभार नंदकिशोर सवडतकर यांनी मानले.
** छत्रपतींना दिलेला शब्द पूर्ण केला : आ.बोंद्रे
आमदार राहुल बोंद्रे यांनी १५ जानेवारी रोजी शहरामध्ये आलेल्या शिवशाहू यात्रेदरम्यान छत्रपती शिवाजी महाराज आणि हिंदुसूर्य महाराणा प्रताप यांच्या पुतळ्याचे सौंदर्यीकरण करावे, अशी सूचना आपणांस छत्रपती संभाजीराजे भोसले यांनी केली होती. महाराजांची सूचना आमच्यासाठी आदेश होती. ती पूर्ण करण्यासाठी पुढे सरसावलो; मात्र लोकार्पणासाठी महाराजांनी वेळ द्यावी, अशी अट घातली होती. आज या लोकार्पण सोहळ्याच्या निमित्ताने छत्रपती संभाजीराजेंनी दिलेली सूचना पूर्ण करू शकलो, याबाबत समाधान वाटते आणि त्यासाठी नगरपालिकेचे विद्यमान अध्यक्ष शोभाताई सवडतकर आणि माजी अध्यक्ष अरुणाताई कदम आणि त्यांच्या सहकार्यांप्रती ऋृण व्यक्त करणे गरजेचे ठरते. शिवशाहू यात्रेदरम्यान छत्रपती संभाजीराजे राज्यभर फिरले, सर्वसामान्य जनतेच्या व्यथा समजून घेतल्या आणि त्या सोडविण्यासाठी शासनदरबारी पाठपुरावा केला. खर्या अर्थाने महाराज छत्रपती सारखेच रयतेमध्ये वावरले, अश्या शब्दांमध्ये आमदार राहुल बोंद्रे यांनी महाराजांच्या शिवशाहू यात्रेचाही गौरव केला.