‘नवोदय’च्या विद्यार्थी संसदसाठी २१ उमेदवार विजयी

शुक्रवारी मंत्री आणि मुख्यमंत्र्यांची निवड.

अकोला : शहरानजीक असलेल्या बाभूळगाव येथील नवोदय विद्यालयात विद्यार्थी संसद (शालेय मंत्रिमंडळ) गठित करण्यासाठी बुधवारी मतदान घेण्यात आले. मतमोजणीनंतर दुपारी निवडणुकीचा निकाल जाहीर करण्यात आला. त्यामध्ये विद्यार्थी संसद प्रतिनिधी म्हणून २१ विद्यार्थी उमेदवार विजयी झाले. निवडून आलेल्या विद्यार्थी संसद प्रतिनिधींमधून मंत्री आणि मुख्यमंत्र्यांची निवड शुक्रवार, २८ ऑगस्ट रोजी करण्यात येणार आहे. नवोदय विद्यालयातील विद्यार्थ्यांना लोकशाहीचे धडे देण्यासाठी जिल्हाधिकारी जी.श्रीकांत यांच्या संकल्पनेतून विद्यार्थी संसद गठित करण्यात येत आहे. त्यासाठी २४ विद्यार्थी संसद प्रतिनिधींची निवड करण्याकरिता निवडणूक घेण्यात आली. त्यामध्ये तीन विद्यार्थी उमेदवारांची अविरोध निवड झाल्याने, २१ विद्यार्थी प्रतिनिधींसाठी ६0 उमेदवार निवडणूक रिंगणात होते. २१ विद्यार्थी प्रतिनिधी पदांसाठी बुधवारी सकाळी १0 ते दुपारी १ वाजेपर्यंत नवोदय विद्यालयात मतदान घेण्यात आले. प्रभात किड्स स्कूलच्या योग धारस्कर व राम घोंगडे या विद्यार्थ्यांंनी विकसित केलेल्या सॉफ्टवेअरद्वारे ऑनलाइन आणि मतपत्रिकेवर शिक्के मारून पारंपरिक पद्धतीने मतदान घेण्यात आले. ४४४ विद्यार्थी मतदारांनी मतदानाचा हक्क बजावला. त्यानंतर लगेच मतमोजणी करण्यात आली व दुपारी निवडणुकीचे निकाल जाहीर करण्यात आले. त्यामध्ये २१ विद्यार्थी उमेदवार विजयी झाले. मतदान प्रक्रियेदरम्यान जिल्हाधिकारी जी.श्रीकांत, उपविभागीय अधिकारी संजय खडसे तसेच निवडणूक निर्णय अधिकारी प्रतीक्षा तेजनकर यांनी नवोदय विद्यालयात मतदार विद्यार्थ्यांसोबत निवडणुकीसंबंधी चर्चा केली. विद्यार्थी संसद प्रतिनिधी म्हणून निवडून आलेल्या विद्यार्थ्यांंमधून २८ ऑगस्ट रोजी १0 मंत्री आणि शालेय मुख्यमंत्री व उपमुख्यमंत्र्यांची निवड करण्यात येणार आहे. त्यासाठी जिल्हाधिकार्‍यांच्या उपस्थितीत निवडून आलेल्या प्रतिनिधींची बैठक बोलाविण्यात आली आहे. विद्यार्थी संसदेच्या मंत्रिमंडळ तसेच मुख्यमंत्री व उपमुख्यमंत्र्यांचा शपथविधीदेखील २८ ऑगस्ट रोजी होणार आहे.