दुहेरी खून खटल्यातील आरोपीस जन्मठेप

रिसोड तालुक्यातील मांगवाडी हत्याकांडप्रकरणी जिल्हा व सत्र न्यायालयाचा निकाल.

वाशिम : पत्नीसोबत घरगुती कारणावरुन झालेला वाद विकोपाला जावून घडलेल्या दुहेरी हत्याकांडातील एका आरोपीस जिल्हा व सत्र न्यायालयाने शुक्रवारी जन्मठेपेची शिक्षा सुनावली. हे हत्याकांड रिसोड तालुक्यातील मांगवाडी शेत शिवारात घडले होते. मांगवाडी (रिसोड) येथे ११ ऑक्टोबर २0१0 दोजी दुपारी हे हत्याकांड घडले होते. आरोपी अर्जुन भानुदास देव्हारे हा घटनेच्या दिवशी पत्नी प्रयागबाई आणि वडील भानुदास यांच्यासोबत शेतात काम करीत होता. त्यावेळी पत्नीसोबत आरोपीचा घरगुती कारणावरुन वाद झाला. त्याचा राग येवून आरोपीने कुर्‍हाडीने पत्नीच्या डोक्यावर वार करुन गंभीर जखमी केले होते. त्यावेळी बाजुच्या शेतात असलेले आरोपीचे काका रामेश्‍वर वाळके, विश्‍वनाथ वाळके आणि आजोबा नामदेव देव्हारे हे समजावण्यासाठी गेले असता, आरोपीने त्यांनाही मारहाण केली. या हल्ल्यात देव्हारे यांचा जागीच, तर विश्‍वनाथ वाळके यांचा उपचारादरम्यान मृत्यू झाला होता. रागाने बेभान झालेल्या आरोपीने वाटेल त्याला मारहाण करण्यास सुरूवात केली. लोणी- रिसोड मार्गावरील मांगवाडी फाट्याजवळ लोकांवर दगडफेक करून, दुचाकीने जाणार्‍या सुखदेव आणि पार्वती कांबळे या दाम्पत्यास अडवून त्यांनाही लाकडी राफ्टरने मारहाण केली. याशिवाय रमेश थोरात, सुखदेव कांबळे यांनी मध्यस्थी करण्याचा प्रयत्न केला असता, त्यांनाही मारहाण केली. पोलिसांना या प्रकाराची माहिती मिळाल्यानंतर, त्यांनी गावकर्‍यांच्या मदतीने आरोपीस ताब्यात घेतले. तत्कालीन पोलीस उपनिरीक्षक किरण साळवे यांनी घटनेचा तपास करुन आरोपीविरुद्ध गुन्हा दाखल केला. न्यायालयाने या प्रकरणी १३ साक्षीदार तपासले. सरकारी पक्षाचा युक्तिवाद, प्रत्यक्ष साक्षीदार, तसेच अन्य पुराव्यांच्या आधारे गुन्हा सिद्ध झाल्यामुळे आरोपी अर्जुन देव्हारे यास कलम ३0२ नुसार जन्मठेप आणि पाचशे रुपये दंड, कलम ३२५ नुसार ३ वर्ष सक्त मजुरी तसेच कलम ३४१ नुसार एक महिना साधी कैद आणि शंभर रुपये दंडाची शिक्षा न्यायालयाने सुनावली. सरकार पक्षातर्फे सहाय्यक सरकारी वकील अँड. अरुण सरनाईक यांनी युक्तिवाद केला.