शहरात पुन्हा एकदा कोरोना विषाणूचा माेठ्या प्रमाणात प्रादुर्भाव झाला असून रुग्णांच्या संख्येत दिवसेंदिवस वाढ होत चालली आहे. संशयित किंवा कोरोना बाधित रुग्णांचा जिल्हा सामान्य रुग्णालयाकडून अहवाल प्राप्त झाल्यानंतर सर्वप्रथम मनपाच्या वैद्यकीय आरोग्य यंत्रणेने सतर्क होऊन रुग्णाला उपचारासाठी दाखल करण्यापासून ते संबंधित रुग्णाच्या संपर्कातील व्यक्तींच्या इत्थंभूत माहितीची नोंद ठेवण्याची गरज आहे. जिल्हा सामान्य रुग्णालयाकडून कोरोनाबाधित रुग्णाची माहिती प्राप्त झाल्यानंतर वैद्यकीय यंत्रणेने मलेरिया विभागाला पूर्वसूचना देऊन फवारणीसाठी पथके रवाना करणे, बाधित रुग्णाच्या कुटुंबातील सदस्यांची तपासणी करण्याची आवश्यकता असताना या विभागाची यंत्रणा ताेकडी पडत असल्यामुळे समस्यांचे निराकरण हाेत नसल्याचे दिसत आहे. शहरात काेराेनाबाधितांची संख्या वाढत चालली असल्यामुळे नागरिकांनीच सतर्कता बाळगणे गरजेचे झाले आहे.
रुग्णसंख्या वाढली !
मनपाचे प्रभारी वैद्यकीय आरोग्य अधिकारी डॉ. फारूख शेख मागील अनेक दिवसांपासून आजारी रजेवर असल्याची माहिती आहे. त्यामुळे डाॅ. अस्मिता पाठक यांच्याकडे प्रभार साेपविण्यात आला असून त्यादेखील आजारी आहेत. अशावेळी अधीनस्थ अधिकारी व कर्मचारी इमानेइतबारे कामकाज करीत आहेत. या विभागाकडे शहरातील पाॅझिटिव्ह रुग्णांची आकडेवारी उपलब्ध असली, तरी त्यामध्ये दिवसेंदिवस वाढ हाेत असल्यामुळे मनपाची यंत्रणा सैरभैर झाली आहे.
झाेन अधिकारी तणावात
गतवर्षीच्या तुलनेत यंदा जानेवारी महिन्यापासून काेराेनाबाधितांच्या संख्येत प्रचंड वाढ हाेत असल्याचे चित्र समाेर आले आहे. वर्तमानस्थितीत शासकीय असाे वा खासगी रुग्णालयांमध्ये खाटांची कमतरता निर्माण झाली आहे. शहराच्या कानाकाेपऱ्यांत प्रादुर्भाव वाढल्याचे पाहून मनपा आयुक्त निमा अराेरा यांनी झाेन अधिकाऱ्यांच्या जबाबदारीत वाढ केली आहे. काेराेनाचा वाढता प्रसार पाहता काही झाेन अधिकारी तणावात असल्याची माहिती आहे.