सहायक अभियंता पोलीस कोठडीत

हिवरखेड येथील युवा शेतकरी आत्महत्या प्रकरण.

हिवरखेड/तेल्हारा/आकोट : शेतकरी विनोद खारोडे आत्महत्या प्रकरणातील आरोपी सहायक अभियंता संदीप घोडेला न्यायालयाने मंगळवारी दोन दिवसांची पोलीस कोठडी सुनावली. पोलीस घोडेने आणखी काही शेतकर्‍यांचा विद्युत जोडणीसाठी छळ केला होता काय, याचाही शोध घेणार आहेत. घोडेला हिवरखेड पोलिसांनी सोमवारी नागपूर येथे अटक केली होती. विद्युत जोडणी मिळत नसल्याच्या उद्वेगातून तळेगाव बाजार येथील २४ वर्षीय विनोद खारोडे या शेतकर्‍याने १९ मे रोजी विष घेतले होते. विनोदचे वडील रामदास खारोडे यांनी दिलेल्या तक्रारीनुसार, हिवरखेड पोलिसांनी महावितरणचा सहायक अभियंता संदीप घोडे, उपकार्यअभियंता आर.टी. राऊत यांच्याविरुद्ध गुन्हा दाखल केला होता. पोलिसांनी तपासादरम्यान महावितरणकडून माहिती संकलित केली. काही शेतकर्‍यांचे जबाबही नोंदविले होते. दरम्यान, घोडेचा अटककपूर्व जामीन अर्ज आकोट येथील सत्र न्यायालयाने ९ जून रोजी फेटाळला होता. त्याला मंगळवारी पोलिसांनी आकोट येथील प्रथम श्रेणी न्यायदंडाधिकारी दिलीप मालवीय यांच्या न्यायालयात हजर केले. न्यायालयाने त्याला दोन दिवस पोलीस कोठडीत ठेवण्याचाआदेश दिला. सरकारतर्फे सहायक सरकारी अभियोक्ता भगत यांनी युक्तिवाद केला. यावेळी हिवरखेडचे ठाणेदार भास्कर तंवर उपस्थित होते. *पोलीस घेणार घोडेची झाडाझडती सरकारी वकिलांनी सहायक अभियंता संदीप घोडेच्या पोलीस कोठडीची मागणी केली. आरोपीकडून प्रकरणाचे संबंधित दस्तावेज जप्त करणे आवश्यक असून, आरोपीने आणखी काही शेतकर्‍यांचा छळ केला आहे काय, याचाही शोध घेणे गरजेचे असल्याचा मुद्दा वकिलांनी पोलिसांतर्फे मांडला. तपासादरम्यान आरोपीने उडवाउडवीची उत्तरे दिली असून, सखोल तपासासाठी पोलीस कोठडी आवश्यक असल्याचे सरकारी वकील म्हणाले.