संगमनेरात १४ वर्षीय अल्पवयीन मुलीचा विनयभंग

शहरातील वेताळबाबा मंदिराजवळ मंगळवारी (दि.२२) रात्री ९.४० च्या सुमारास ही घटना घडली.

संगमनेरमध्ये १४ वर्षीय मुलीस काटवनात ओढून तिला लज्जा उत्पन्न होईल, असे कृत्य करणाऱ्या विरोधात शहर पोलिस ठाण्यात गुन्हा दाखल करण्यात आला आहे. शहरातील वेताळबाबा मंदिराजवळ मंगळवारी (दि.२२) रात्री ९.४० च्या सुमारास ही घटना घडली.

साई सूर्यवंशी (पूर्ण नाव माहीत नाही, रा. अकोले नाका, संगमनेर) असे गुन्हा दाखल झालेल्याचे नाव आहे. त्याच्याविरोधात पिडित मुलीच्या आईने दिलेल्या फिर्यादीवरून पोलिसांनी गुन्हा नोंदवून घेतला आहे. पिडित अल्पवयीन मुलगी साईनगर परिसरातील रहिवासी असून ती शालेय शिक्षण घेते. ‘तू माझ्या बरोबर मैत्री करून संबंध ठेव’ असे सूर्यवंशी तिला म्हणाला. त्यानंतर त्याने तिला काटवनात ओढून लज्जा उत्पन्न होईल, असे कृत्य केले. 

घाबरलेली मुलगी आरडाओरड करत तेथून पळून जात असताना सूर्यवंशी याने तिचा पाठलाग केला. असेही फिर्यादीत म्हटले आहे. सूर्यवंशी याच्याविरोधात यापूर्वीही गुन्हे दाखल असून, तो रेकॉर्डवरील आरोपी आहे. असे तपास अधिकारी पोलिस उपनिरीक्षक सुनील माळी यांनी सांगितले.